O grupo municipal do PP no Concello da Coruña reprochou ao goberno local “falta de xestión”, á vez que lle urxe a executar investimentos, ao asegurar que “só foi capaz” de facelo con “o 8% do orzamento de investimentos cando xa transcorreu a metade do ano”. “Os coruñeses sofren as consecuencias da falta de xestión de Inés Rei xa que non levou o orzamento ao pleno ata febreiro, cando debería facelo en novembro para que entrase en vigor o un de xaneiro”, sinala nun comunicado.

Nel, o seu portavoz, Miguel Lorenzo, sostén que “aos 300 millóns de euros sen investir no últimos seis anos únense agora 117 millóns de euros máis“, engade para soster que “do orzamento total, a execución é do 24%”. Os populares aluden ao contido da documentación que acompaña ao expediente do modificativo que hoxe foi á comisión de Facenda e o venres irá a pleno e demanda máis investimentos en barrio. Pola súa banda, o grupo municipal do BNG avanza que levará a pleno as queixas que, segundo afirma, hai de usuarios e usuarias sobre o carril bici. “Unha cousa son os grandes titulares sobre o uso do carril bici e outra cousa moi distinta a realidade dunha infraestrucutra básica“, sinala a edil Avia Veira, que afirma que hai queixas sobre o estado da infraestrutura.