Teno claro o Concello da Coruña. Importan moitos máis os festivais privados de pago que o Noroeste. Así de rotundo se amosou este mércores o mesmo Concelleiro de Cultura, Gonzalo Castro, no marco da presentación da Romaría de Santa Margarida: “Acostumámonos mal, quen queira ver grupos de nivel sabe que ten que pasar por taquilla”.
Lonxe de ser unha frase mal escollida ante as preguntas dunha prensa que non entende como que a unha semana do festival aínda non se coñeza a programación, o concelleiro xustificou que se trata dunha estratexia de goberno: “non é só unha razón económica, senón de política cultural”, como recolle La Opinión.
Castro foi máis alá, e intentou comparar o feito de facer un festival potente dende o eido público, coa “industria”, cando precisamente o seu goberno está primando os intereses dos Morriña, SoundFest e demais festivais privados sobre un evento que permite que a cultura sexa accesible a todo o mundo. Lamentable escoitar unha visión tan elitista dun goberno socialista que se louba de educar aos coruñeses coa súa “pedagoxía cultural”: “Necesitamos educar a todo o público. Despois, para abordar outras cuestións, están as iniciativas privadas, que terán que asumir o risco e a aventura dos seus negocios”
Non é só pois, a desgana e o desinterese por un Festival público que chegou a ser recoñecido como o Mellor Festival de todo o Estado. Ese festival que chegaba a todos os recunchos da cidade, que reunía no areal de Riazor dende hai case de 40 anos, xa non existe para este goberno.
Quedará pois o Noroeste para as migallas, ou para as “bandas emerxentes”, como se xustificou Castro, cando apenas queda unha semana para o que debería ser o comezo do festival, e do que apenas sabemos, por unha filtración a La Voz en febreiro, que tocarán The Vaccines e Luar na Lubre.
Máis novas
Primeiras queixas pola tardanza na publicación do programa das Festas de María Pita e do Noroeste
