A sección primeira da Audiencia Provincial da Coruña condenou, como autor dun delito de insolvencia punible agravado pola contía e a titularidade pública dos créditos, á pena de prisión de catro anos ao administrador único dunha empresa domiciliada en Culleredo. En concepto de responsabilidade civil, impúxolle o pago dunha indemnización á Axencia Tributaria de 7.709.298 euros; e á Tesouraría Xeral da Seguridade Social, de 336.143 euros, incrementadas cos intereses legais e con incorporación dese crédito á masa do concurso conforme.
Segundo informa o Tribunal Superior de Xustiza, a sentenza non é firme, pois cabe presentar recurso ante o alto tribunal galego. Os feitos probados sitúan ao empresario condenado como administrador único dunha mercantil entre febreiro de 2010 ata febreiro de 2018. A empresa non tiña unha estrutura propia e a súa xestión levábaa directamente o propio empresario, “sen que fronte a terceiros se diferenciase da dos seus asuntos persoais”.
AXUDA PÚBLICA DE 5 MILLÓNS
A sociedade estaba domiciliada nunha nave sita no Parque Empresarial de Alvedro e foi declarada en concurso en decembro de 2016. A mercantil foi concesionaria o 26 de outubro de 2011 dunha axuda pública mediante o outorgamento dun préstamo reintegrable de 5 millóns destinado a financiar un proxecto de enxeñaría. Segundo a sentenza, a entidade incumpriu as condicións da entrega, ao reintegrar tan só unha pequena parte dos intereses devengados nos anos 2012 e 2013 e non realizar actividade algunha para a que se concedeu. Por tal causa o préstamo foi resolto mediante acordo de data 8 de febreiro de 2016.
A mercantil cesou na súa actividade efectiva e deixou de atender aos seus pagos desde polo menos o exercicio de 2014, última data na que legalizou os seus libros e na que xa presentaba uns ingresos moi inferiores aos seus gastos de persoal e ás súas débedas a curto e a longo prazo. A pesar de ser coñecedor desta situación, o empresario, agrega o fallo, omitió os seus deberes de control administrativo e contable desde polo menos o exercicio de 2015. Desde esa data e ata a declaración de concurso a finais de 2016, non depositou as contas no Rexistro mercantil, nin elaborou ningún documento de contabilidade ou organización desde 2015. Esta actuación impediu que os seus acredores dispuxesen duns mínimos coñecementos sobre a situación económica real da empresa.
