No vindeiro mes de marzo, nunha data aínda sen certificar, terá lugar o XXIV Festival Intercentros, ese evento que une talento de mozos e mozas coa solidariedade.

Será unha xornada de actuacións a cargo das escolas de música, as academias de danza e numerosos centros escolares da cidade, dentro das tres categorías de grupos en directo, canción e coreografías, que servirá para recadar fondos, nesta ocasión para as Asociacións Dano Cerebral e BoanoiTE.

O obxectivo do Festival Intercentros é invitar a compartir o apoio de todo o público asistente mediante a recadación da propia gala, e a aportación de alimentos que tamén se leva a cabo na mesma.

ADACECO, Asociación de Dano Cerebral Adquirido, é unha entidade formada por 200 familias que traballa de forma integral por e para os afectados  por esta doenza e as súas familias.

Pola súa parte, BoanoiTE, creada dende a parroquia San Francisco de Asís que axuda ás xentes sen fogar da cidade, ofrecéndolles un pouco de atención, agarimo, e un chocolate quente.