Continúan os traballadores e traballadoras desenvolvendo a súa folga en rexeitamento ao convenio de empresa asinado en Madrid por UGT e CCOO, que recorta substancialmente as condicións salariais e laborais actuais. Este xoves tivo lugar a terceira xornada de folga, e o persoal aproveitou para concentrarse na praza do CC Marineda – onde a operadora de telecomunicacións conta cunha tenda- e repartir follas informativas entre a clientela sobre os motivos do conflito.

Unha xornada máis, segundo denuncian dende a CIG-Industria, “a empresa está intentando vulnerar o dereito á folga con prácticas de esquirolaxe, ao desprazar un importante continxente de traballadores/as da provincia de Pontevedra e de Asturias para que fagan o traballo dos compañeiros en folga. Esta actuación ilegal foille comunicada á Inspección de Traballo para que incorpore estes feitos e amplíe a denuncia presentada o martes pola CIG, por unha práctica similar pero naquel día con persoal trasladado dende Madrid. Ademais, hai que salientar que, nos días previos á folga, a empresa dedicouse a enviar correos ameazadores ao comité co obxectivo de amedrentar o persoal para que non secundara os paros”, sinalan.

Lembran que “o convenio de empresa promovido por DIGI e negociado en Madrid sen contar coa participación de todos os sindicatos con representacións nos comités nin coa opinión do conxunto do persoal só ten como obxectivo precarizar as condicións de traballo, afastar as relacións laborais dos centros de traballo e debilitar calquera resposta colectiva”.

Máis novas

O persoal de DIGI volve á rúa contra a precarización