O Obelisco da Coruña será escenario o vindeiro venres, 3 de outubro, dunha lectura continuada dos nomes dos nenos e nenas palestinas asasinadas durante a ofensiva israelí en Gaza. Esta acción, que arrincará ás 08.00 horas, xa se repetiu noutros lugares, como Madrid ou Ourense, onde a semana pasada se reuniron ao redor de 200 persoas. A organización da acción ‘Os Nomes’, a cargo de BDS Galiza e CUAC FM, realizou un chamamento a través das redes sociais para a captación de voluntarios dispostos a participar na lectura, que poden porse en contacto a través do teléfono ou correo electrónico facilitado na convocatoria.
A través dun comunicado, lembran que a acción de protesta levarase a cabo de forma ininterrompida durante ao redor de 13 horas, unha estimación que noutros lugares foi maior. Por exemplo, en Ourense –onde arrincou á mesma hora prevista na Coruña– terminou á medianoite despois de 16 horas de lectura. Deste xeito, a cidade herculina únese a outros puntos do mundo onde se replicou esta acción. Bo exemplo diso é Madrid, onde interviñeron máis de 300 artistas, como Pedro Almodóvar, Miguel Ríos, Ester Expósito ou Macarena García.
