As novas da detención esta pasada noite da Flotilla Global Sumud por parte do exército israelí en augas internacionais están trascendendo en todo o mundo. Un exército que acusa a unha expedición humanitariae pacífica de “terrorista”, e de apoiar a Hamás, para tratar como delincuentes a ducias de activistas e profesionais de ata 44 países.
Ante esta nova vulneración dos dereitos humanos por parte do goberno sionista de Israel, a sociedade galega e estatal volve unirse e convoca concentracións para este xoves 2 de outubro. No caso da Coruña desta volta será na Delegación do Goberno, na Praza de Ourense.
Dende o Movemento Global para Gaza – Galiza, Ánxela Gippini informa de que a última hora da noite podían connfirmar a intercetación de tres navíos: O Alma, O Sirius e o Adara e entre a tripulación secuestrada está a nosa compañeira e representante do Movemento Global para Gaza – Galiza, Sandra Garrido. Tamén informaban do secuestro doutras 11 persoas de nacionalidade española, entre as representantes das numerosas delegacións que fan parte da Flotilla Sumud Global.
Segundo o rasteador oficial da Flotilla, 37 barcos continúan a navegación rumbo a Gaza e manteñen a súa misión humanitaria.
O Movemento Global a Gaza- Galiza van realizar unha rolda de prensa este mesmo mediodía de xoves en Compostela pero animan á sociedade a participar nas concentracións desta tarde.
“Exiximos a protección desta misión humanitaria e a apertura dun corredor que permita romper co cruel bloqueo que está a sufrir Gaza”, sinala nun comunicado Gippini. “Exiximos tamén a inmediata liberación das activistas humanitarias secuestradas”; e “exiximos a representantes políticos que garantan a súa seguridade e activen os protocolos diplomáticos e medidas de denuncia e sanción destes ataques”.
APOIO DA REDE ACAMPA POLA PAZ
“Liberdade para os activistas que integran a flotilla da dignidade interceptada ilegalmente en augas de Gaza. Protección para os civís que só levaban medicamentos, auga e alimentos para os gazatíes extenuados despois de dous anos de asedio. Un non inequívoco e unísono nas rúas de Galicia e de toda España contra esta nova vulneración de todos os dereitos executada por Israel, fronte ao silencio vergoñoso dos gobernos ou o temor interesado da comunidade internacional”.
Ese é o chamamento que fai Acampa pola Paz no convencemento de que permitir que esta nova acción de Israel quede impune é fallar, unha vez máis, ao pobo de Gaza e aos propios principios da Humanidade.
Por iso, o Movemento Acampa traslada a todos os seus asociados (máis de 77 organizacións locais, nacionais e internacionais, e centos de particulares) a participar nas concentracións convocadas para esta tarde en todas as cidades e pobos de Galicia para reivindicar o respecto aos Dereitos Humanos, o Dereito Humanitario e o Dereito Internacional que Israel pisa impunemente.
Condena contra o “xenocidio” en Gaza no pleno do Concello da Coruña
