Hai anos que o voluntariado, sendo peza fundamental na acción social, non é o principal motor das entidades do terceiro sector (agás nalgunhas entidades que aínda falan de beneficiencia no canto de solidariedade). Ese é un dos mitos que está intentando desbancar a campaña #OrgulloTerceiroSector que lanza EAPN Galicia (a Rede Europea contra a Pobreza, European Anty Poberty Network), xunto con outras 35 entidades.
Unha campaña para poñer en valor o traballo das entidades do terceiro sector, para que a sociedade coñeza que significa o seu traballo como “axentes fundamentais na transformación social e na defensa dos dereitos e igualdade das persoas máis vulnerables”.
Así o debullaron esta semana nun evento realizado na sede do Colexio de Xornalistas. O acto, que trata de romper co “veo de descoñecemento e prexuizos” arredor das entidades, contou coa introdución de Manuel Rey, membro da Xunta de Goberno do Colexio Profesional de Xornalistas de Galicia. ”
Ana Pardo, presidenta da EAPN Galicia, explicou o funcionamento desta rede integrada noutros colectivos a nivel estatal e europeo e que agrupa a 36 entidades autonómicas do terceiro sector implicadas na loita contra a pobreza e a exclusión. “Aínda que traballamos con grupos de poboación diferentes, o traballo que facemos parte dos mesmos principios”, asegurou.
A comunicación
Unha das eivas do sector é clave: a comunicación. Empeñadas en facer “o importante”, as entidades dedican poucos recursos a comunicar, a trasmitir á sociedade en que consiste o seu traballo. O propio director da EAPN Galicia, Xosé Cuns, recoñeceu as “eivas comunicativas”, e fronte a esta situación propón trasladar que o Terceiro Sector “é un axente clave na defensa dos dereitos e a igualdade e que é xerador de riqueza e emprego, respresentando no estado un 1,5% do PIB e dando emprego a máis de 600.000 persoas. “Somos entidades altamente profesionalizadas”, asegurou Cuns, aínda que recoñecendo que “chegamos tarde a ter gabinetes de comunicación”.
