Un equipo do Centro de Investigación en Tecnoloxías Navais e Industriais, con sede no campus industrial de Ferrol da Universidade da Coruña (UDC), desenvolveu unha investigación que vincula a alta cociña galega coa restauración de ecosistemas mariños. Foi, informa o reitorado coruñés, ao reutilizar cunchas de bivalvos procedentes de restaurantes con estrela Michelin como material sustentable para a construción de arrecifes artificiais.

O traballo foi publicado na International Journal of Gastronomy and Food Science (Elsevier, 2025), unha recoñecida revista de gastronomía científica. No estudo abórdase como vincular a innovación gastronómica coa sustentabilidade na contorna mariña. O equipo autor do mesmo demostrou que os restos poden utilizarse como compoñentes de ecoformigóns, onde substitúen ata un 20 % do árido groso tradicional sen alterar a resistencia dos materiais.