O Parque Rosalía Mera situado entre as rúas do Mar e da Poza, en Dorneda, Oleiros, vén de levar primeiro premio na 5ª edición dos Premios Xardín Galego 2025. Un recoñecemento outorgado pola AGAEXAR que trata de poñer en valor a humanización de espazos naturais nas cidades.
O xurado destacou que Parque Rosalía Mera é “un proxecto exemplar pola integración de arte, técnica e sustentabilidade. Destaca a forte implicación social, a educación ambiental, a creación de hábitats naturais, o uso de especies autóctonas e materiais locais, así como o deseño resiliente e orientado á mellora bioclimática”.
Dende o Concello destacan a rápida inclusión social deste espazo público de 19.908 m2, xa naturalizado entre a veciñanza para facilitar convivencia interxeracional, ofrecendo espazos habilitados, cómodos e accesibles para o paseo, o descanso, o lecer ou a actividade física.
O proxecto materializado sobre un solo de titularidade privada de clasificación urbana, co firme compromiso da promotora de destinalo a uso público para o lecer da veciñanza, nun entorno de presión urbanística; foi obra da empresa de paisaxismo Orza Paisajismo, o Grupo Naturalista Hábitat e a empresa de economía social Trébore Jardinería, con destacadas colaboracións de empresas locais, artesáns, artistas e o propio Concello de Oleiros.
O segundo premio foi para a Rehabilitación do Concello Vello de Moaña, o terceiro para a Rehabilitación e deseño de xardín en San Vicente de Mañufe, quedando por detrás outras propostas como o Proxecto Residencial Foxos, en Sanxenxo (Pontevedra), de Carmela Moral Ardines (Orza Paisaxismo); o Reaxardinamento da zona exterior – Proxecto Marga-Sabarís, de Marina Muñoz Orta (Brivegmar).
