A Asociación de Escritoras e Escritores en Lingua Galega lanza unha nova saída pola cidade da Coruña. O Roteiro Illas. Faros. Nortes. A Coruña de Askja, guiado por Antonio M. Fraga, vai ter lugar o sábado 25 de outubro, a partir das 12:00 horas, tendo como punto de partida a Escola de Arte e Superior de Deseño Pablo Picasso. Non é necesaria inscrición previa.
Esta iniciativa da AELG pretende dar a coñecer as cidades e vilas do país da man das nosas escritoras e escritores, que exercen de guías tomando como base obras propias ou alleas vinculadas a eses espazos. Deste xeito, posibilítase que a cidadanía goce persoalmente dos espazos físicos na súa relación coa memoria literaria.
Nun exercicio de nostalxia autorreferencial, Antonio M. Fraga fará unha guía por algúns dos espazos polos que transitan as personaxes da súa novela Askja. Lembrarán A Coruña de comezos do milenio a través varios locais (algúns dos cales xa non existen) e cruzarán o espello para coñecer os seus reflexos mitolóxicos en Islandia.
A actividade conta co apoio do Concello da Coruña.
