A asociación ecoloxista Arco Iris denunciou, que tras finalizarse os traballos de recuperación da ría do Burgo, “persisten os puntos de vertedura de augas residuais”. Nun comunicado, sinala que o último foi localizado nas proximidades da ponte da Pasaxe e, segundo indica, “parece proceder dunha urbanización próxima, porque se atopa ao final dunha liña de rede de sumidoiros”.

En concreto, expón que as correntes residuais resultan “máis evidentes coa baixamar, cando se aprecia en todo o seu esplendor a auga contaminada e o característico pestazo que adoitan desprender este tipo de atentados ambientais”. Así, Arco Iris esixe a “inmediata eliminación” da vertedura e lembra que o pasado mes de xullo houbo denuncias doutros residuos en distintos puntos do litoral do Concello de Oleiros (A Coruña).

Dende o Concello, acusan de intereses políticos á asociación, asegurando que “en Oleiros non existe ningunha rede de alcantarillado que verta directamente á ría nin ao mar. E é máis, no caso da ponte Pasaxe ao que se refiren, existe un bombeo baixo a ponte que recolle todas as augas residuais de Perillo e de gran parte do municipio; desde onde se impulsan ata a planta de Bens. As redes que desembocan directamente no mar ou na ría –como as das fotos que envía a asociación ecoloxista- son as que recollen as augas pluviais, que por arrastres ou outro tipo de incidencias poden ver modificado a súa cor, olor ou aspecto, en función de determinadas circunstancias climatolóxicas; o que non supón que exista contaminación”.