O Sindicato de Enfermaría Satase denunciou o que cualifica como “grave situación” nos centros sanitarios da Coruña durante a actual campaña de vacinación da gripe. “Porque o Sergas non está a cubrir de forma adecuada a ausencias programadas ou non programadas de enfermeiras“, sostén o sindicato para o que “a deficiencia na cobertura está a xerar que nas consultas haxa unha sobrecarga de traballo que repercute directamente na calidade da asistencia sanitaria e na saúde laboral destas profesionais”.
En concreto, sostén que “non se están bloqueando as axendas das enfermeiras nin se están reprogramando as súas citas, o que lles obriga a atender a todos os pacientes previstos a pesar da redución de persoal que sofren os seus respectivos centros”. Neste sentido, o Sindicato de Enfermaría subliña que “ao ter que atender ás persoas coa metade do persoal, increméntase a presión asistencial sobre as enfermeiras e dificúltase que se poida ofrecer, en todo momento, unha atención segura e de calidade”.
“Esta situación de asumir cargas de traballo “desproporcionadas” prexudica tamén ás enfermeiras afectadas, xa que se incrementan os niveis de tensión laboral, co consecuente desgaste físico, psicolóxico e emocional”, argumenta. Por outra banda, reclamaral Sergas medidas urxentes, entre elas unha cobertura inmediata das ausencias programadas e sobrevindas e que se proceda á reprogramación de citas e bloqueo de axendas cando non se dispoña de persoal suficiente.
RESPOSTA DA XERENCIA
Desde a xerencia da área sanitaria da Coruña e Cee precisouse que a día de hoxe a porcentaxe de substitucións do persoal de enfermaría nos centros de saúde da área sanitaria é do 92 %. “A vacinación é unha prioridade absoluta nesta época do ano”, indicaron a Europa Press para engadir que “o 88 % das cotas de enfermaría de Atención Primaria da área sanitaria da Coruña e Cee teñen un oco de cita dispoñible en menos de catro días a través da web e o mesmo día se a atención o require”. Ademais, engaden que “non se trasladou á dirección” ningunha cuestión relacionada co contido do comunicado remitido desde o citado sindicato de enfermaría.
