Coa intención de recoñecer o traballo de entidades ou personas a título individual na defensa dos dereitos humanos, o club de opinión Foro Cívico da agrupación cultural Alexandre Bóveda anuncia a convocatoria da 6ª edición do Premio Marcelino Liste, Xustiza e Liberdade. Para poder optar ao mesmo, tanto as asociacións como as personas interesadas, terán que desenvolver súa actividade no ámbito da comarca da Coruña.

As propostas deberán identificar á entidade ou á persona seleccionada con nome, enderezo teléfono e mail, acompañadas dun breve historial que xustifique os méritos para a eleizón. Poderánse enviar através do mail  info@acalexandreboveda.gal, tamén vía correo ordinario ao enderezo rúa Santo André, nº 36-1º, ou personalmente no mesmo enderezo en horario de tarde, indicando en ambos casos no sobre que se trata do Premio Marcelino Liste.
O prazo de entrega finaliza o vindeiro 8 de decembro. Un xurado integrado por socios da agrupación cultural Alexandre Bóveda, pero non da xunta directiva, decidirá o gañador desta 6ª edición que tentará entregarse coincidindo precisamente co 10 de decembro, Día Internacional dos Dereitos Humanos.

O Foro Civico considera que o impacto que Marcelino Liste tivo no nacemento e consolidación do movemento asociativo veciñal na Coruña desde 1974 foi trascendental para dotar aos barrios de infraestructura e servizos dos que adolecía.  A denuncia das inxustizas e da hipocresía imperante nunha época de fortes convulsións sociais, permitiulle desenvolver unha inesgotábel capacidade de traballo a prol dos sectores máis vulnerabeis e desfavorecidos dos barrios cunha valente actitude de defensa das liberdades individuais fronte ao crecente intervencionismo dos sectores máis acomodados. A coherencia en todo momento co tempo que lle tocou vivir, xustifica que o seu nome estea inseparablemente unido ao concepto de xustiza e liberdade.