O mozo que caeu desde o alto da fonte da praza de Azcárraga, na Coruña, segue en estado grave con traumatismo cranoencefálico e ingresado na Unidade de Coidados Intensivos (UCI). Así o informaron a Europa Press fontes hospitalarias á espera do novo parte médico que se facilitará ás 12.00 horas deste luns. O mozo presenta diversos golpes e contunsións pola caída após a cal foi trasladado ao Hospital Universitario da Coruña.
Despois do sucedido, a estatua que coroaba o monumento — coñecido como Fonte do Desexo — quedou derrubada, de modo que o Concello abrirá un expediente para reclamar os danos. Non entanto, consultados por Europa Press, insistiron este luns en que “o primeiro” é que o ferido “se recupere canto antes e totalmente das súas lesións”. Dos danos, precisaron, mentres, que “non están avaliados”.
FEITO NOCTURNO
Eran as 0:00h do pasado domingo cando saltaban as alarmas en plena Praza de Azcárraga. Un mozo desas novas cuadrillas que invaden a habitual paz nocturna da Cidade Vella, subíase á Fonte do Desexo, supostamente para facerse unha foto, cando a estatua da fonte caía sobre el.
De contado, a ambulancia do 061, Policía Local e Bombeiros achegábanse ao lugar e levaban ao mozo, ferido de consideración, ao CHUAC.
Fontes do Concello da Coruña, que desexa a “pronta e total” recuperación do mozo de 25 anos, informan de que se abrirá un expediente para que se faga cargo dos danos causados a este “monumento histórico”.
