Un incendio rexistrado nun edificio da rúa Colón, no barrio coruñés de Monte Alto, obrigou a última hora da noite do martes a evacuar a varios residentes. O servizo de emerxencias 112 Galicia deu o aviso sobre as 23:19 horas, tras recibir alertas por un lume nun segundo andar con posible saída de chamas pola fachada.

Ata o lugar desprazáronse os Bombeiros da Coruña e efectivos da Policía Local, que colaboraron no desaloxo preventivo dos veciños que se atopaban na cuarta planta do inmoble. Segundo o parte de incidencias, os bombeiros procederon á extinción das chamas e a realizar labores de ventilación para asegurar o edificio.

Unha vez disipado o fume e garantida a seguridade da estrutura, os residentes puideron volver ás súas vivendas. A intervención concluíu sen que se notificasen danos persoais, máis alá dos danos materiais causados polo lume no piso afectado.