A Xunta inviste máis de cen mil euros no mercado coruñés de San Agustín de cara á súa integración na rede galega de mercados excelentes. Unha rede que por agora só conta cos de Carballo, Tomiño, Vilagarcía de Arousa e Pontedeume.

O director xeral de Comercio e Consumo, Gabriel Alén, visitou este venres o mercado, onde puxo de relevo os máis de 100.000 euros destinados pola Xunta á instalación dun sistema de xeración de xeo que posibilite a consecución do selo de mercado excelente.

Alí, sinalou que esta achega autonómica sucedeu á do ano pasado, dirixida á realización de accións de mentorización e actuacións de formación das placeras e placeiros e para a elaboración do diagnóstico da situación e usos do mercado.