A Rolda Peonil dos Barrios é un proxecto para cambiar a mobilidade da cidade, que pretende vertebrar os barrios altos da cidade a través dun pulmón verde sen coches, libre para ir a pé, en bici ou patinete. A Rolda Peonil ten como obxectivo unir o Parque de San Diego co Parque da Agra, onde xa comezaron as obras de acondicionamento do Xardín do Observatorio) pasando polos barrios da Gaiteira, Catro Camiños, Os Mallos, Sagrada Familia e Agra do Orzán, e dembocando na avenida da Habana para chegar a Riazor.
Un proxecto lanzado cando Juan Díaz Villoslada era o edil de urbanismo (2019-2022), baseado na Rolda dos Barrios que xa se estaba formulando, e enmarcado nun conxunto de estratexias e políticas coas que se pretendía mudar dunha forma substancial a forma de concebir a mobilidade na cidade, inspirándose en experiencias contrastadas doutras cidades: A Rolda Peonil, Cidade 30, a cidade dos 15 minutos, Bicicoruña e a rede de ciclovías, novos espazos públicos, carril-bus en Juan Flórez (do que se chegou a facer estudo de viabilidade e incluso proxecto constructivo a financiar con fondos Next e que está no caixón) e logo na rolda de Outeiro e mesmo en Alfonso Molina, reforma dos Cantóns, Santo André, renovación integral de todo o paseo marítimo, etc. eran todas pezas desta nova política urbana que tamén tiñan como guía os corredores verdes do Plan Busquets contidos no actual PXOM.
Neste mesmo marco urbanístico, o Concello integrouse na Rede de Cidades que Camiñan, participou na Rede de Cidades pola bicicleta, e se aprobou, aínda hai nada, unha nova Ordenanza de mobilidade. Un Plan que trataba de trasladar tamén aos barrios lonxe do centro, medidas de calidade urbana, dende unha preocupación pola saúde pública e o cambio climático.
Por onde vai a Rolda Peonil
Así comezaron as obras de humanización no barrio da Gaiteira. Seguiu por Catro Camiños coa obras nas rúas Primavera e Alcalde Marchesi; foi subindo polos Mallos atravesando a Avenida de Arteixo a través das rúas Puga e Parga, e Ramón Cabanillas. E o proxecto anda xa pola Sagrada Familia, onde xa se traballou na rúa San Jaime, e onde se vén de inaugurar un treito da rúa que dá nome ao barrio.
De feito, este mesmo xoves unha cominitiva municipal vén de estrear o novo treito humanizado da rúa Sagrada Familia, entre as rúas Nosa Señora da Luz e San Xaime, onde se peonalizou unha superficie de 2.200 metros cadrados. Para acondicionala, o o Concello dispuxo case 30 novas árbores e 438 plantas, así como 24 bancos e 10 papeleiras. Un treito realizado pola empresa Construcciones Cernadas, que custou pouco máis de medio millón de euros.
Podes ver aquí o mapa por capas nesta ligazón.
Continuidade cara a Agra do Orzán
A Rolda terá continuidade pola Sagrada Familia tras a adxudicación das obras de humanización correspondentes ao segundo treito da rúa homónima e tamén de Antonio Carballo, cun investimento dun millón de euros.
Máis novas
O Concello da Coruña avanza nas obras do parque do Observatorio
Novos pasos da Rolda peonil da Sagrada Familia e do parque infantil cuberto do Ventorrillo
