Pasaron 9 meses dende a última sesión, pero este martes 24 de febreiro volveu convocarse o Consello da Memoria Democrática da Coruña. Así informa, neste caso, o BNG, que agradece a súa convocatoria “aínda que chegue tarde”.
Tarde, pero a tempo, tamén chega a aposta por levar ao Pleno a proposta de cumprimento da Lei de Memoria Democrática, coa aplicación do Informe elaborado polo Instituto José Cornide sobre os símbolos franquistas que aínda existen nos espazos públicos da Coruña. I é que o informe está dispoñible dende hai 5 anos, incumprindo a Lei de Memoria Democrática, como denuncia o propio grupo nacionalista, e outras entidades da cidade.
“Desde o BNG, celebramos que, nove meses despois, por fin se teña realizado unha sesión do Consello da Memoria Democrática, ao tempo que valoramos tamén moi positivamente a proposta de levar a Pleno unha demanda moi reiterada por parte do movemento memorialista da Coruña, a de eliminar por fin toda a simboloxía franquista que segue presente nos espazos públicos da cidade”, afirma Mercedes Queixas.
No informe do Instituto José Cornide, dado a coñecer en novembro de 2021, instábase a retirar honras e distincións a connotados franquistas como Pedro Barrié de la Maza, Alfonso Molina ou Sergio Peñamaría de Llano.
Máis novas de memoria democrática
Presentan un informe para solicitar a eliminación de 373 símbolos franquistas na cidade da Coruña
