Centos de traballadoras e traballadores do comercio vario da provincia da Coruña manifestáronse este domingo no centro da cidade para reclamar “condicións laborais e salariais dignas” e rexeitar o convenio estatal impulsado pola patronal do téxtil, Asociación Retail Téxtil España. A mobilización foi convocada pola Confederación Intersindical Galega, que reclama que as asociacións empresariais retomen as negociacións e actualicen o convenio provincial, caducado o 31 de decembro de 2025. A protesta partiu da Praza de Lugo, zona na que se concentran numerosos establecementos comerciais afectados por este acordo laboral.

SALARIOS E DEREITOS “CONXELADOS”

Segundo explicou a delegada sindical Lucía Domínguez, desde que expirou o convenio provincial o persoal do sector mantén os soldos e dereitos conxelados. Ademais, criticou que a Confederación de Empresarios de Galicia non avanzase na negociación dun marco galego. A CIG considera que a creación de ARTE por parte de varias multinacionais do comercio responde á intención de “degradar os dereitos conquistados” no sector. “É a actividade que máis riqueza crea nesta provincia, pero os inxentes beneficios que producimos son acaparados por escasas persoas, mentres nós temos problemas para manter ás nosas familias”, denunciou Domínguez.