Organizou o pasado venres o BNG e Galiza Nova da Coruña o acto “Garantir a Vivenda. Erradicar a Crise”. A candidata do BNG á Alcaldía, Avia Veira, instou ao Goberno Local a que amplíe a bolsa municipal de vivendas en aluguer e a que faga un estudo do parque inmobiliario da cidade que permita saber con exactitude cantos pisos baleiros existen na Coruña, paso previo para a súa posta no mercado.
Estas son algunhas das propostas que se lanzaron neste acto no que tamén interviñeron Andrés López e Santiago Lamelo, da Plataforma Galega Vivenda Xa e da Plataforma polo Dereito á Vivenda, respectivamente, ben como tamén o concelleiro de Urbanismo de Santiago de Compostela, Iago Lestegás.
“O Goberno Local ten que facer un estudo do Parque Inmobiliario da cidade. Queremos saber en que situación se atopan as famosas 20 mil vivendas baleiras que hai na Coruña, en que situación de accesibilidade, de habilitabilidade, para as pór no mercado e aumentar a oferta de vivendas en aluguer”, afirmou Avia Veira.
“O da vivenda non é un problema xeracional, non afecta só a mocidade. É un problema transversal e atinxe sobre todo as persoas traballadoras. Hoxe na Coruña é practicamente imposíbel mercar un piso co salario normal dunha persoa traballadora. Desde o BNG imos traballar para termos unha Courña en que a xente poda vivir nos seus barrios”, engadiu.
A Xunta ten competencias exclusivas
Desde o Concello pódense despregar políticas que melloren a situación -entre elas citou a de facer de EMVSA unha empresa que honre o seu nome e teña como obxectivo principal aumentar a oferta de vivenda pública en aluguer-, mais as principais competencias na materia tenas a Xunta. “Así o indica o artigo 27.3 do Estatuto de Autonomía”, esclareceu.
Lamentou que o balance da Xunta do PP na nosa cidade sexa desolador. “Desde 2009, a Xunta de Feijoo primeiro e logo de Rueda só construíu 40 vivendas na Coruña. 40”.
