Cando toda a cidade (agás Paco Vázquez) asumía a boa nova da normalización (e adecuación á oficialidade) do topónimo do equipo de fútbol da cidade, onte o club anunciaba que antes de tomar a decisión vai realizar unha “consulta vinculante entre os seus abonados”, para decidir o topónimo que acompañará a partir de agora ao Real Club Deportivo.
En calquera caso, o motor desta reivincación segue fundacionando, e a mocidade do IES Rafael Dieste volve á carga con outro concerto, despois do organizado na previa do Eibar con Grande Amore. Os promotores da iniciativa #Aquítaménsefala organizan un novo concerto gratuíto na previa do encontro entre o Deportivo e o Andorra que se celebrará este 17 de maio, Día das Letras Galegas, ás 14:00h, nunha nova acción para reivindicar lingua, cultura e deportivismo.
A xornada arrincará este domingo 17 de maio, ás 12:30 horas cun concerto gratuíto das bandas Boyanka Kostova (que xa tocou na primeira edición do festival ATSF) e Lume do Loop, convertendo a contorna do estadio nun espazo de encontro arredor da música galega, o fútbol e a defensa da identidade da cidade e do club.
A xornada completaranse co reparto de máis de 40.000 adhesivos da campaña “O Dépor é da Coruña”.
Desde a iniciativa nacida no IES Rafael Dieste –e á que xa se sumaron máis de 300 centros educativos, ademais de entidades como a Real Academia Galega, o Consello da Cultura Galega, o Concello da Coruña, a Deputación da Coruña ou a Xunta de Galicia, encoraxan ao club a “escoitar o clamor popular” e dar o paso definitivo cara ao nome de Real Club Deportivo da Coruña, unha reivindicación que a plataforma leva meses impulsando e que conseguiu un amplo apoio social.
Máis novas
O Dépor realizará unha consulta vinculante aos seus abonados para galeguizar ou non o topónimo
