Unha moza de 20 anos de idade que deu positivo en alcolemia bateu na mañá deste sábado contra un muro no paseo marítimo da Coruña e tratou de fuxir do punto andando. Segundo informaron fontes policiais, o suceso produciuse ás 7:45 horas deste sábado, cando a muller chocou contra un muro que separa a rúa dun aparcadoiro, á altura da rúa Sol.

Debido ao forte impacto, a condutora resultou ferida leve, do mesmo xeito que outro mozo que a acompañaba no vehículo. Ambos os dous foron localizados polos axentes nunha rúa próxima cando abandonaban a pé o lugar do accidente.

As mesmas fontes explicaron que a moza foi trasladada ao Complexo Hospitalario Universitario da Coruña (CHUAC) para ser atendida dunha ferida leve, mentres que o seu acompañante recibiu asistencia médica no propio punto do sinistro. Pola súa banda, o coche tivo que ser retirado da vía pública polo guindastre municipal.