Conta atrás para o verán, e para as Festas de María Pita. O 1 de agosto volven comezar as festas mási esperadas do ano na cidade, e o farán co pregón de Lucía Veiga e a actuación de Luz Casal.
A actriz coruñesa e presidenta da Academia Galega do Audiovisual, Lucía Veiga, será a responsable de dar o pregón desde o balcón do Palacio Municipal de María Pita.
De seguido, a cantante de Boimorto será a primeira artista do programa festivo, nun concerto co que dará comezo un mes de actividades culturais e musicais en diferentes espazos da cidade. Luz Casal presentará o seu novo espectáculo, ‘Me voy a permitir’, un proxecto no que ofrece “o traballo máis ecléctico e inclasificable da súa carreira”, no que amosa dez formas de entender o mundo a través de dez cancións.
As Festas de María Pita volverán ofrecer un amplo programa de concertos, actividades culturais e propostas para todos os públicos, consolidándose como unha das citas máis destacadas do verán galego.
