Non deixa de medrar a campaña #Aquítaménsefala, convertida xa nun referente europeo da dinamización cultural e lingüística desde a mocidade. O proxecto normalizador nado do seo do IES Rafael Dieste e que xa implica a 300 centros de ensino de todo o país, celebra o seu punto álxido o vindeiro venres 12 de xuño. Dende as 17:00h, a Praza da Tolerancia convertirase no epicentro da música galega coa celebración do seu Festival.
Un festival que nesta 3ª edición pega un salto internacional grazas á incorporación ao cartel da artista portuguesa Carolina Deslandes, unha das voces máis relevantes da música lusa contemporánea e auténtico fenómeno social cun millón de seguidores en Instagram nun país de pouco máis de dez millóns de habitantes.
A presenza de Deslandes marca un novo fito para un festival que, desde a súa creación, conseguiu situar a música e a lingua galegas nun espazo de prestixio, convivencia e celebración colectiva. Todo ademais convertindo un grupo de alumnos e alumnas de ESO e Bacharelato en organizadores de todo un festival. Esa é precisamente unha das A grandes singularidades deste proxecto, pois son os propios estudantes quen lideran boa parte das accións, asumindo tarefas de comunicación, produción audiovisual, organización cultural e dinamización social.
Xunto á artista portuguesa, o festival continúa afianzándose como escaparate para a cultura galega. Así actuarán as bandas galegas Apolo 18, Kid Mount e De Ninghures, tres propostas que representan a diversidade, a renovación e o momento de efervescencia creativa que vive actualmente a música galega.
Tras congregar arredor de 5000 persoas en cada unha das súas anteriores edicións, o “Festival Aquí tamén se fala” afronta este novo capítulo coa ambición de seguir medrando sen renunciar á súa esencia: demostrar que a mocidade pode liderar proxectos culturais de grande impacto e que a lingua galega ten capacidade para ocupar con naturalidade os escenarios, as rúas, as pantallas e os espazos de referencia do presente.
Así foron as dúas primeiras edicións
O #Aquítaménsefala segue revertendo o rumbo lingüístico da cidade
Outras novas
O colectivo #Aquítaménsefala estoupa contra a indiferenza do Real Club Deportivo
Antón Corral e a campaña #Aquítaménsefala recoñecidos con sendos Premios da Cultura Galega 2025
