O Concello da Coruña avanza a bo ritmo coa folla de ruta do Plan Municipal de Vivenda 2024-2030, unha ambiciosa actuación urbanística que permitirá, a medio prazo, habilitar 50 novas vivendas municipais en Xuxán que se destinarán integramente a alugueres sociais. A alcaldesa, Inés Rey, informou hoxe destas últimas novidades durante unha visita institucional á parcela Z-37 do barrio, situada á beira da rúa Cernadas, onde se están a executar as obras de construción do inmoble.
Inés Rey supervisou de primeira man os avances sobre o terreo e sinalou que os traballos se atopan actualmente “na fase final da execución da estrutura do edificio, que terminará, no seu conxunto, ao longo deste verán”. Na visita técnica a rexedora estivo acompañada polo concelleiro de Economía e Planificación Estratéxica, José Manuel Lage, polo xerente da empresa construtora Citanias, Javier Sal, e por persoal técnico responsable do proxecto.
Segundo as previsións manexadas polo goberno local, está estipulado que os traballos construtivos estean completamente rematados no ano 2027. O Concello da Coruña destina un investimento total de 10,2 millóns de euros á edificación deste bloque de 50 vivendas protexidas, unha contía da cal case unha cuarta parte procede do financiamento de fondos europeos Next Generation.
