A Coruña acolle deste sábado, día 13, e ata o 20 de xuño o festival DiversidArte Festival cunha ampla programación cultural inclusiva en distintos espazos da cidade.
Así se informou, na presentación, dunhas actividades organizadas pola Asociación Poten100mos, coa colaboración do consistorio coruñés cuxo concelleiro de Cultura e Turismo, Gonzalo Castro, estivo presente no acto. O festival reunirá a artistas profesionais, persoas con discapacidade, creadoras e creadores emerxentes e entidades sociais ao redor dunha programación aberta á cidadanía. “DiversidArte é un exemplo de potencial da cultura para derrubar prexuízos e reforzar a cohesión social en nuetra cidade”, sentenciou o edil herculino.
Un dos momentos centrais terá lugar o 18 de xuño, coincidindo co Día Internacional para Contrarrestar o Discurso de Odio, coa celebración do IX Concurso Internacional de Cinema Social DiversimaCine, no Campo da Leña.
