Case 4 meses despois da sentenza do Supremo, a finca do Pazo segue rexistrada a nome dos Franco, tal e como consta na nota simple emitida polo Rexistro da propiedade no día de hoxe.
Así o denuncia a Comisión pola Recuperación da Memoria Histórica da Coruña, que lembra que “non consta que o Estado instase do Rexistro á cancelación dos asentos rexistrais”.
A entidade lamenta a “pasividade e inacción do Estado respecto da execución da sentenza súmase á relativa á activación de medidas para a apertura total do Pazo ás visitas e para a xestión conveniada de usos”.
Lembran que “no fallo de sentenza ordénase, expresamente, non so a titularidade-dominio do Estado e a nulidade dos títulos de propiedade dos Franco senon tamén “la cancelación de las inscripciones registrales contradictorias del dominio que se declara sobre las mencionadas fincas”.
As visitas
A entidade volve pedir ao estado que abra o Pazo. “O Pazo de Meirás é a todos os efectos (agás os rexistrais) unha propiedade pública e non existe xustificación algunha para que o Estado o teña pechado e impida a visita pública a estancias interiores que eran visitabeis cando a familia Franco xestionaba a apertura do Pazo, obrigados polo establecido na Lei de Patrimonio Cultural de Galiza, que agora incumpre o Estado coa pasividade da Consellaría de Cultura”.
“A inacción e pasividade do Estado neste asunto súmase á falla de desenvolvemento e activación efectiva das comisións e órganos de participación previstos no Protocolo inter-administrativo de xuño de 2021, conxelado por decisión do Estado, a pesar das demandas do memorialismo galego e do propio Concello de Sada”, remata.
A CRMH reclama ao Goberno central “abrir xa ao público” o Pazo de Meirás
A CRMH leva ao Concello da Coruña ante a Fiscalía de Memoria Democrática
