Traballadores de Ferroglobe mobilizouse este mércores ante a fábrica de Sabón, en Arteixo, contra o Expediente de Regulación de Emprego (ERTE) presentado pola empresa para 113 empregados durante ano e medio.
O comité (CIG e UGT) rexeita este ERTE por consideralo “totalmente desproporcionado” ao enviar 113 traballadores ao ERTE desde o 1 de agosto de 2026 ata final de 2027, “sendo o corpo directivo o menos afectado por esta regulación”.
Ferroglobe alega causas organizativas polo prezo da enerxía e a baixada de prezos pola competencia do mercado asiático, o cal o comité non ve xustificado.
Nun comunicado, a CIG subliña que “non pode ser que unha vez máis o conxunto dos traballadores e traballadoras sexan quen pague as consecuencias de factores totalmente alleos á planta de Sabón”.
Neste sentido, lembran que este é o cuarto ERTE que Ferroglobe aplica na fábrica de Arteixo e que cada vez se acurta máis o tempo da actividade produtiva entre expedientes. O último terminou a súa vixencia en decembro de 2024, polo que o persoal “nin sequera tivo tempo a repor o dereito íntegro a cobrar o paro”.
Advirte que de executarse o ERTE que pretende a empresa, os traballadores esgotarían a súa prestación por desemprego, sen que ademais existan garantías de continuidade dos postos de traballo.
PERÍODO DE CONSULTAS E FOLGA
O período de consultas do expediente termina o 28 de xullo e “as posturas das partes están moi afastadas”, xa que o persoal entende que o tempo de aplicación do ERTE resulta excesivo e que unha empresa da magnitude de Ferroglobe “ten capacidade económica suficiente para asumir un complemento salarial que permita que o persoal non vexa minguado o seu poder adquisitivo”.
De maneira paralela á concentración, unha representación do comité mantivo unha reunión con representantes da consellería de Industria e de Emprego para demandar a intervención da administración, tendo en conta que Ferroglobe é beneficiaria de millonarias subvencións e axudas públicas e que a planta de Sabón é a única instalación en todo o Estado dedicada á produción de silicio metal.
A sección sindical da CIG xa ten convocada folga na fábrica para o vindeiro luns, 27 de xullo, en resposta ao ERTE e ante a falta de avances na negociación coa empresa.
