A nova xornada de folga convocada no comercio da alimentación na provincia da Coruña está a ter un seguimento “masivo”, segundo os sindicatos, que apuntan a “tendas a medio gas” e centros loxísticos “sen actividade”.
Ante a falta de avances na negociación, este sábado 25 e o domingo 26 tamén haberá paros, que convocan o catro sindicatos con representación na mesa de negociación: CIG, UGT, CC.OO. e USO. A plataforma de convenio que demanda a parte social é unitaria.
Segundo a CIG, este venres 24, véspera do Día de Galicia e en plena celebración das festas do Apóstolo en Santiago, o seguimento está a ser “masivo”, con tendas “a medio gas” e “sen actividade” nos centros loxísticos de Gadis, xa que Froiz non ten nesta provincia.
Nunha nova xornada con piquetes numerosos, pero sen incidencias, as demandas céntranse en Gadis e Froiz, que segundo as organizacións “controlan o convenio”, xa que neste texto non están nin Mercadona, nin Eroski, nin os grandes almacéns como Carrefour e Alcampo.
Este domingo 26 é día de apertura autorizada no comercio e hai supermercados de localidades pequenas que abren todos os domingos do ano.
