Segundo informou a Consellería de Presidencia, os operativos foron realizados por axentes do Equipo de Resposta Policial (Erpol) da Unidade da Policía Nacional Adscrita de Galicia (UPA) e por efectivos do Servizo de Gardacostas de Galicia, en colaboración coa Confraría de Pescadores da Coruña. Ademais do percebe incautado, os axentes interviñeron diverso material empregado na actividade furtiva, como placas de poliespán e equipamento de mergullo profesional. O marisco decomisado foi posteriormente doado a un centro benéfico da cidade tras superar os controis sanitarios.
Nunha das actuacións, a confraría detectou a dous furtivos equipados con traxes e material de mergullo profesional, o que lles permitía acceder a zonas de difícil alcance e capturar exemplares de maior tamaño. Segundo a Xunta, esta práctica supón un grave prexuízo para o medio mariño e unha competencia desleal para os profesionais do sector pesqueiro.
Outro dos dispositivos requiriu a presenza de efectivos policiais a bordo dunha embarcación para apoiar aos Gardacostas, debido á actitude hostil de varios furtivos, que se negaban a identificarse nunha zona insular de acceso complexo. Estas actuacións enmárcanse no reforzo da loita contra o furtivismo impulsado pola UPA, a Consellería do Mar e as confrarías de pescadores para protexer os recursos mariños galegos.
