CIG, CCOO e UGT denunciaron a “situación de bloqueo” da negociación do convenio colectivo do sector da hostalaría na provincia da Coruña. Así, anunciaron a posibilidade de convocar varias xornadas de mobilizacións, entre elas, o próximo 12 de agosto, día do eclipse total de sol. Nun comunicado, as organizacións sindicais expoñen que “despois de ano e medio” desde a finalización do convenio e coas plantillas con “salarios conxelados desde o 1 de xaneiro de 2025”, “os empresarios insisten en recortar dereitos xa recoñecidos, como o complemento durante a baixa por enfermidade”.

Preguntada por este asunto, a alcaldesa da Coruña, Inés Rey, pediulle á patronal “máis sensibilidade coas condicións laborais dos traballadores e traballadoras da hostalaría”. Estes, ao seu xuízo, realizan un labor “nalgúns casos, ingrato e estresante porque hai pouca man de obra”. “Levan moitos anos reclamando melloras, nada excesivo”, salientou a rexedora para engadir que o concello “apoia esas reivindicacións”, que considerou “totalmente lóxicas”. Entre elas, citou a estabilidade laboral, a mellora salarial e o respecto ás baixas médicas.

No tocante ás negociacións, sinalou que “o Concello, nese asunto, é un mero espectador”. Non obstante, fixo fincapé no seu “compromiso” de lle trasladar á patronal as demandas do sector. “Hai que darlles estabilidade”, instou para sinalar que “aínda queda tempo para poder sentarse, acordar e falar, de aquí ao 12 de agosto”.