A Xunta anunciou que licitará “nos vindeiros días”, por máis de 50 millóns de euros, as obras correspondentes á fase 2.1 do Novo Chuac, que inclúe a escavación sobre a que se construirá o novo edificio de Atención Médica. Así o sinalou a directora da Axencia Galega de Infraestruturas, María Deza, en declaracións aos medios. “A mediados de agosto procederase ao derrubo de tres vivendas que hai na rúa Curramontes por dificultaren a continuidade da execución das obras”, detallou.
O anuncio produciuse tras unha reunión da Comisión de Seguimento do Novo Chuac, celebrada na Delegación Territorial da Xunta na Coruña. Na xuntanza participaron, entre outros, a directora xeral de Recursos Económicos do Sergas, Amparo Pousada; o xerente da Área Sanitaria da Coruña e Cee, Luis Verde; e o portavoz do Goberno local herculino, José Manuel Lage.
OS ACCESOS AVANZAN SEGUNDO O PREVISTO
No relativo aos accesos, Deza explicou que os traballos avanzan “segundo o programa previsto” e que o desvío provisional está funcionando “sen dar problemas”. “A previsión é que esa obra remate en setembro de 2027”, avanzou a directora da Axencia Galega de Infraestruturas.
A ASISTENCIA SANITARIA MANTENSE CON NORMALIDADE
Pola súa banda, o xerente da Área Sanitaria da Coruña e Cee, Luis Verde, destacou que a actividade asistencial continúa desenvolvéndose con normalidade malia a complexidade das obras. “A asistencia sanitaria estase a prestar con absoluta normalidade, malia tratarse duns traballos complexos e aparatosos”, asegurou.
