A Garda Civil de Oleiros, en colaboración coa Policía Local, investiga tres veciños da Coruña como presuntos autores de dous delitos de lesións cometidos durante as Festas do Carmen da zona de Mera. Os feitos producíronse na madrugada do pasado 18 de xullo, cando os investigados supostamente percorrían o recinto festivo increpando e provocando o resto das persoas asistentes. Segundo explica a Garda Civil nun comunicado, os tres homes terían chegado a abalanzarse sobre aquelas persoas que lles reprochaban a súa actitude, xerando momentos de desconcerto e indignación entre o público.
Nun primeiro momento, desprazáronse ata o lugar efectivos da Policía Local de Oleiros, que procederon a identificar as persoas presentes. Posteriormente, acudiu a Garda Civil, que asumiu a investigación dos feitos. Como resultado do traballo de campo e das actuacións realizadas, os axentes lograron identificar os tres presuntos responsables. Con todo, a investigación continúa aberta e non se descarta que aumente o número de persoas investigadas.
