A alcaldesa da Coruña, Inés Rey, apelou ao consumo responsable da auga no contexto das altas temperaturas rexistradas durante estes días. Así o manifestou a preguntas dos xornalistas, despois de que municipios como Betanzos difundisen recomendacións para promover un uso responsable dos recursos hídricos. A rexedora aclarou que o Concello da Coruña realiza este tipo de comunicados cando existe unha situación de alerta. “Facemos ese tipo de comunicados cando efectivamente hai unha alerta”, sinalou. Porén, precisou que este non é o caso da cidade herculina. “Non é o caso”, engadiu.
“NON HAI PROBLEMA DE AUGA NESTE MOMENTO”
A pesar de descartar unha situación de escaseza, Inés Rey insistiu na importancia de facer un uso responsable da auga en calquera época do ano. “Facémolo sempre, no verán e no inverno”, afirmou. A alcaldesa vinculou esta recomendación cos efectos do cambio climático, cuxa existencia reivindicou fronte aos discursos negacionistas. “O cambio climático existe, porque hai moito negacionista”, apostilou. Con todo, reiterou que “non hai problema de auga neste momento” na Coruña.
