A Comisión pola Recuperación da Memoria Histórica (CRMH) da Coruña anunciou que recorrerá a resolución pola que se declara o Pazo de Meirás como Lugar de Memoria Histórica, ao considerar que a motivación desa declaración non é a axeitada e que debe ter como eixo central a defensa da memoria das vítimas do franquismo.
Nun comunicado, a CRMH confirmou a presentación dun recurso de reposición tras analizar con outras entidades memorialistas os argumentos que utiliza a Secretaría de Estado para xustificar a declaración de Lugar de Memoria (unha declaración que a propia CRMH reclamou). O recurso terá como eixo central a defensa da memoria das vítimas. “Non estamos a falar dun plan de usos nin de aspectos culturais do Pazo de Meirás. A declaración só debe ter en conta, na xustificación, as vítimas, a represión e os atentados cometidos contra os dereitos humanos e a súa vulneración sistemática”, apuntaron.
EMILIA PARDO BAZÁN, NON É VÍTIMA
Segundo lembrou a Comisión, o Pazo é un lugar de Memoria “vinculado á represión franquista”, e non se trata, nese sentido, de enarborar outros valores culturais ou literarios. Así, no relativo á alusión a Emilia Pardo Bazán, recollida na declaración da Secretaría de Estado, a CRMH lembrou que a escritora non foi vítima do franquismo e que, de feito, faleceu antes do golpe de Estado de 1936. “Polo tanto, a súa figura non pode ser un eixo xustificativo do Lugar de Memoria”, sinalou a Comisión, que incidiu en que recorrerán para solicitar que a clave da declaración sexan as “vítimas da represión franquista”.
Por outra banda, tamén pedirán que se restitúa a denominación de Pazo de Meirás, tras se eliminar “sorprendentemente” a denominación “Pazo” na declaración; e que se corrixan erros na tipificación do espolio, no relato da represión, ou a “omisión absolutamente irregular” do papel xulgado polas asociacións memorialistas como promotoras da iniciativa.
O recurso presentarase “próximamente” e conta co apoio de entidades como a Agrupación Cultural Alexandre Bóveda, a AAVV Atochas-Montealto-A Torre, a Asociación Veciñal da Agra do Orzán, a AC Eira Vella de Betanzos, a Agrupación Cultural O Galo de Santiago, a asociación viguesa Memoria, Verdade e Xustiza, ou as ourensás Comité pola Memoria Histórica do Val do Limia e Comité de Memoria Histórica da Comarca de Celanova. Tamén recibiron o respaldo doutras organizacións como Vía Galega, Fundación Galiza Sempre, Fundación Moncho Reboiras ou a CIG, ademais doutras entidades memorialistas de fóra de Galicia.
