Interesante a proposta da Federación de Asociacións Veciñais da Coruña e Área Metropolitana para favorecer a vida comunitaria e unir os barrios a través da cultura.
“Cultura Veciñal” é un novo programa de actividades, apoiado pola Deputación e o Concello, pensado para público infantil e familiar en torno a eixos de temática social. “Co programa Cultura Veciñal, a Federación reforza o seu compromiso coa dinamización sociocultural, a participación cidadá e a defensa dun modelo de cidade que recoñece a cultura como ferramenta de cohesión, inclusión e identidade compartida”, indicou Luisa Varela, presidenta da Federación.
O programa inclúe cinco sesións de contacontos e animación infantil en espacios públicos centradas en valores fundamentais para a convivencia.
Calendario de actividades:
• 19 de setembro · Praza de Tabacos. Catro Camiños (A Coruña)
• 9 de outubro · Rúa Monasterio de Caaveiro. Ventorrillo (A Coruña)
• 23 de outubro · Rúa Enrique Mariñas. Praza do Eroski. Matogrande (A Coruña)
• 6 de novembro · Rúa Mozart. Martinete (A Coruña)
• 20 de novembro · Local Social de Sigrás, O Souto – Sigrás (Cambre)
