A alcaldesa da Coruña, Inés Rey, volveu reclamar á Xunta que xestione os fondos que o Goberno central transferirá á Administración autonómica galega para esta cidade e para a de Santiago, ao seren ambas declaradas mercados tensionados. “2,4 millóns e 1,2 millóns”, sentenciou en relación coas partidas para aumentar o parque municipal de vivenda pública e para axudas destinadas a mobilizar vivenda baleira.
“Fixemos unha proposta para destinar 2,4 millóns de euros á renovación dos alugueiros sociais das vivendas propiedade do Concello para que se incorporen ao mercado e 1,2 millóns para unha convocatoria anual de axudas directas ao pagamento deses seguros contra o impago que cobren o risco nas vivendas baleiras”, sentenciou.
Fíxoo ao explicar que desde o consistorio se enviaron dúas cartas á conselleira de Vivenda e á ministra de Vivenda “coas propostas do Concello”. “Supoño que non haberá ningún problema”, aseverou tras unha visita ás obras de remodelación do edificio da rúa Veeduría.
