O goberno local da Coruña, liderado pola socialista Inés Rey, prorrogará os orzamentos para 2027 ao non contar co apoio nin do BNG nin do PP, despois de propoñerlles a ambas as formacións abrir unha negociación que foi rexeitada polos dous partidos. No caso do BNG, a negativa chega tras denunciar “incumprimentos” dos acordos alcanzados co PSOE. Pola súa banda, o PP decidiu non acudir á negociación ao criticar que o goberno municipal non lle facilitou a documentación solicitada. “Houbo planificación ao longo destes catro anos, temos capacidade de investimento, ademais de solvencia económica e financeira”, asegurou o portavoz do goberno local, José Manuel Lage, en rolda de prensa.

A pesar da prórroga das contas, o executivo municipal pretende abrir agora unha negociación parcial co BNG. “A partir da semana que vén poremos en contacto o grupo do BNG co obxectivo de que entidades sociais, deportivas, culturais e veciñais poidan dispoñer de convenios e desenvolver as súas actividades”, explicou Lage. O portavoz referíase así á disposición manifestada polos nacionalistas para abordar unha negociación parcial dos orzamentos de 2027.

Foi o voceiro municipal José Manuel Lage Tuñas o que anunciou un investimento de preto de 70 millóns de euros en melloras na cidade entre o que queda de 2026 e 2027.

VIVENDA, BARRIOS E MOBILIDADE

O goberno local sitúa como tres eixes prioritarios para o próximo exercicio a aposta pola vivenda, os investimentos nos barrios e a mobilidade. Segundo Lage, a intención é avanzar nunha política de mobilidade “sostible e eficiente” ao servizo dunha “cidade máis accesible”.

“Imos implantar políticas para mobilizar as vivendas sen uso na cidade, impulsando ao mesmo tempo un plan de vivenda e desenvolvemento urbano co obxectivo de crear máis de 11.000 novas vivendas na Coruña, cedendo solo e facilitando a construción”.
Outra das grandes frontes do futuro inmediato é o impulso de Coruña Marítima, que o concelleiro describiu como un “proxecto transformador e fundamental para a cidade”, e que está a avanzar grazas á colaboración entre institucións —actualmente está en marcha o
proceso de selección dos equipos que elaborarán o Máster Plan—.

No ámbito da mobilidade, Lage subliñou a aposta do Concello por un modelo máis sostible que reforce o transporte público e outros vehículos non contaminantes como a bicicleta —algo que na Coruña está a facerse a través de BiciCoruña, que este ano superou os 2.000.000 de traxectos e está no seu momento de maior número de usos—.

A ampliación do plan para mellorar a rede de áreas infantís na cidade será outro dos grandes obxectivos do Concello.

O BNG: “crónica dunha prórroga anunciada”

“Estamos ante a crónica dunha prórroga anunciada, produto dunha alcaldesa que non ten con quen reunirse”, afirmou a portavoz do BNG no Concello e candidata nacionalista á Alcaldía Avia Veira tralo anuncio. “Seguimos co mesmo xeito de gobernar por parte de Inés Rey. Non vemos nin unha miguiña de autocrítica nin ningún cambio de actitude, o que significa que continúan sen cumprir o acordado”, engade.
Os incumprimentos afectan o orzamento de 2026, resalta Veira, “onde acordamos uns investimentos e unhas obras en barrios que están lonxe de se ter feito”.
Alén diso, o BNG continúa sen ter información sobre como vai resolver o Goberno Local o burato de 12 millóns de euros rexistrado na liquidación do orzamento de 2025.

O PP FALA DUN “PARIPÉ”

Pola súa banda, o portavoz municipal do PP, Miguel Lorenzo, cualificou de “paripé” a convocatoria realizada polo goberno local para negociar as contas. Os populares recibiron a chamada despois de que o BNG anunciase que non negociaría co PSOE o orzamento completo do próximo ano polos supostos incumprimentos dos acordos previos. Lorenzo admitiu que no PP quedaron “sorprendidos” pola convocatoria e expresou a súa “desconfianza” cara ao goberno de Inés Rey. “Tres anos e medio nin o pan”, afirmou, antes de cuestionar que o executivo municipal queira sentarse agora co PP “cando xusto faltan oito meses para unhas eleccións municipais”.

O portavoz popular asegurou que, por “responsabilidade política”, respondeu á carta remitida polos socialistas solicitando unha serie de documentos e información. Con todo, sostén que non obtivo resposta ás cuestións formuladas. “Hai cousas que non son cribles”, afirmou ao cuestionar a boa situación financeira que defende o goberno local. “No que respecta ao crédito, non nos contesta”, engadiu para xustificar que os populares non acudisen á reunión prevista para este martes. Lorenzo cargou tamén contra o BNG, ao que cualificou de “cómplice” do goberno municipal.

CRÍTICAS Á POLÍTICA DE VIVENDA DE INÉS REY

O portavoz popular aproveitou tamén para reprochar á alcaldesa a súa xestión en materia de vivenda. Lorenzo acusou a Inés Rey de non impulsar políticas suficientes neste ámbito e criticou que a rexedora respaldase as medidas promovidas polo Goberno central. “Ten algo de vergoña política”, afirmou. A prórroga orzamentaria deixa así o goberno socialista nun escenario de maior debilidade política de cara ao último tramo do mandato, cun BNG disposto unicamente a negociar cuestións concretas e un PP que rexeita sentarse á mesa nas condicións formuladas polo executivo local.