A alcaldesa da Coruña, a socialista Inés Rey, asegurou que o goberno local está “á espera” despois de lle reclamar á Consellería de Vivenda e Planificación de Infraestruturas unha reunión para abordar a petición municipal de xestionar os fondos estatais para a cidade como mercado tensionado.

Fíxoo despois de rexeitar o que cualificou de “ultimato” da Administración galega, ante a demanda municipal de recibir directamente estes fondos para rehabilitar vivendas e destinalas ao alugueiro social e a postura da Xunta de entregar os algo máis de sete millóns de euros sempre que sexa para construír vivendas.

“Estamos á espera de concertar esa reunión e pechar xa este asunto e as polémicas que se xeraron“, manifestou a preguntas dos xornalistas sobre este asunto despois da rolda de prensa convocada para presentar a nova aplicación para o comercio local.  Ademais, a rexedora herculina recalcou que “a vivenda é a principal preocupación da cidadanía e estaremos aí para resolvelo”.