A música tradicional galega conta cunha historia colectiva construída ao longo de xeracións trala que se agochan infinidade de aventuras, periplos e fazañas, individuais e colectivas, que merecen ser narradas. A Gran Familia. Figuras clave da música tradicional galega, propón achegarse a ese patrimonio a través dun percorrido polos seus protagonistas, como gaiteiros, pandeireteiras, acordeonistas, repentistas e outras figuras que contribuíron a definir a identidade sonora do noso país.

A Gran Familia fai un percorrido biográfico e ilustrado por diferentes épocas e contextos sociais para descubrir quen eran estes músicos, cales foron as súas achegas e como evolucionou unha tradición, moitas veces transmitida oralmente, que soubo adaptarse aos cambios sociais sen perder a súa esencia. Unha ollada que afasta o folclore dunha visión estática ou nostálxica e que reivindica a música tradicional como unha cultura viva, en permanente transformación.

A Asociación Cultural Alexandre Bóveda acolle este venres 13 de novembro, a partir das 20h00, a presentación desta novela, a cargo do seu autor, Tomás Cuesta, que estará acompañado do músico e xornalista Xurxo Souto e do director de Xerais, Fran Alonso. A música en directo de Brais Maceiras pechará o encontro.

Sobre o autor: Tomás Cuesta (Meira, 1989), é mestre de escola e debuxante autodidacta. Afincado na Coruña dende a adolescencia, combina a súa vocación polo debuxo cunha paixón pola música da que se declara “escoitador” obsesivo. A Gran Familia é o seu primeiro libro, un proxecto no que conflúen esas dúas facetas, así como a súa vontade de achegar a cultura musical galega a novos públicos.

“Foliada”, a nova APP para consultar e compartir cantigas galegas