Un total de 155 obras presentaron candidatura aos XXV Premios Mestre Mateo, cuxa gala se celebrará o próximo 27 de febreiro no Palacio de Congresos e Exposicións da Coruña (Palexco), día no que se entregarán os correspondentes galardóns.
A vicepresidenta da Academia Galega do Audiovisual, Alba Galego; a deputada de Cultura, Natividade González; o director da Axencia Galega de Industrias Culturais (Agadic), Jacobo Sutil e o concelleiro de Educación e Innovación do Concello da Coruña, Juan Ignacio Borrego, asistiron este mércores á presentación das candidaturas e das actividades que se desenvolverán.
Na presentación, Alba Galego incidiu na creatividade existente neste ámbito e asegurou que estes premios buscan “promover e difundir o audiovisual galego” a pesar das “dificultades que encara”, remarcou.
En canto ás candidaturas, explicou que engloban a 393 profesionais con 155 obras candidatas. Isto con 19 longametraxes, 52 curtos, 31 programas de televisión, sete series, 30 videoclips e 16 anuncios publicitarios. Todo iso nuns premios con diversidade de formatos e cambios nas categorías para “un recoñecemento equilibrado”, precisou.
O Palexco acollerá a gala dos 25 anos dos Premios Mestre Mateo
Ademais, sinalou que o 26 de novembro empezan as actividades paralelas, que incluirán charlas e proxeccións, mentres que o 23 de decembro coñeceranse os finalistas a estas candidaturas de face xa á gala de febreiro.
Desde as administracións destacouse o talento existente neste sector. Así, Natividade González subliñou que o mesmo é “fundamental” para a cultura e economía galega e apelou a apostar por “a creación e produción propia”.
Así foi a gala do ano pasado:
Máis novas
O festival LGTBIQ+ Norte Cinema Diverso enche a axenda coruñesa

