Renfe porá en marcha 250 servizos de autobús para a fin de semana polas obras na estación da Coruña
Please wait while you are redirected...or Click Here if you do not want to wait.
A ONCE deixa en Cambre un premio de 3.000 euros
‘Mi día’ da ONCE deixou en Cambre un premio de 3.000 euros no sorteo deste mércores, día 18. O boleto foi vendido por Samuel López Rodríguez.
A Coruña será un dos epicentros da folga xeral en apoio ao pobo palestino
Presentaban onte os sindicatos CGT Galiza, Solidariedade Obreira Galiza, CNT Galiza, a Asemblea Internacionalista de Compostela e a Rede Galega pola Palestina, a folga xeral convocada en apoio á loita do pobo palestino para o vindeiro 27 de setembro.
Unha xornada de loita en solidariedade co pobo palestino fronte á ocupación, o apartheid e o xenocidio sionista, que fai chamamento á clase traballadora e aos sindicatos galegos para que se sumen.
Os convocantes reivindican “a ruptura das relacións diplomáticas co Estado sionista, e a suspensión de acordos comerciais e académicos que benefician a dita entidade e a importancia de promover a campaña BDS (Boicote, Desinvestimentos e Sancións) como ferramenta de presión internacional non violenta a Israel”.
Durante a rolda de prensa, anunciáronse as seguintes manifestacións e concentracións previstas para o 27 de setembro en varias cidades galegas:
- A Coruña: Manifestación ás 20h no Obelisco.
- Compostela: Manifestación ás 12h na Praza Roxa e concentración ás 19h na Praza do Obradoiro.
- Pontevedra: Manifestación ás 20h en Loureiro Crespo, fronte ao Hospital Provincial.
- Vigo: Manifestación ás 19h fronte ao Marco.
Ademais, presentouse a Rede Galega pola Palestina, un espazo asembleario en construción, aberto a todas as persoas e colectivos galegos que desexen participar e que terá a súa vindeira xuntanza presencial o sábado 21 de setembro en Ourense, na Asociación Andén Primeiro nunha intensa xornada de actividades de 11h a 20h.
Máis novas
A UDC promoverá unha cátedra por Palestina e non participará en actos con entidades de Israel
Inés Rey reclama maior financiamento para as entidades locais nun congreso en Madrid
A alcaldesa da Coruña, Inés Rey, puxo en valor o traballo dos concellos como administracións “pioneiras” na integración da tecnoloxía TIC para o servizo cidadán. Fíxoo no IV Congreso RECI da Rede Española de Cidades Intelixentes, que tivo lugar en Madrid, durante a mesa de debate ‘Os retos das cidades no horizonte 2030-2050’. Nela, reclamou tamén máis financiamento para as entidades locais.
Segundo informa o consistorio, actualmente, esta rede está formada por máis de 144 municipios socios co obxectivo de abordar os retos dos municipios en materia tecnolóxica e de innovación. Neste sentido, a rexedora coruñesa reivindicou a administración local como “peza crave” no desenvolvemento tecnolóxico por proximidade á cidadanía xa que, na súa opinión, “non hai reto de futuro que non pase por pór no centro os municipios”. No mesmo tempo, Rey reclamou un maior financiamento das entidades locais, “imprescindibles dentro do conxunto do Estado” e denunciou “un déficit moi grande” entre os servizos que ofrecen as ciudadades e os recursos que lles asignan.
Falece un home tras caer ao mar nun coche no porto de Sada
Un home faleceu este xoves tras precipitarse ao mar no interior dun vehículo, no porto de Sada, segundo confirmou o CIAE 112 Galicia.
Os feitos ocorreron pasadas as 9,00 horas, cando varias chamadas a Emerxencias alertaban da presenza dun coche afundíndose no mar, no porto de Sada, e avisaban de que podería haber unha persoa no seu interior.
O 112 Galicia avisou a Urxencias Sanitarias de Galicia-061, Salvamento Marítimo, Servizo de Gardacostas, bombeiros de Betanzos, Policía Local, Garda Civil e Protección Civil de Sada.
Testemuñas que se atopaban pola zona confirmaron que había un home no interior do coche, que xa estaba afundido, polo que se despregou un dispositivo de rescate. Finalmente, un mergullador conseguiu liberar a esa persoa, un home de 76 anos, pero, a pesar dos esforzos dos profesionais sanitarios, nada se puido facer por salvarlle a vida.
O Hospital Materno Infantil incorpora un horto e xardín terapéutico
O Hospital Materno Infantil Teresa Herrera da Coruña incorporou un horto e un xardín terapéutico para nenos e nenas ingresados no centro hospitalario e que este xoves visitou o conselleiro de Sanidade, Antonio Gómez Caamaño. Fíxoo acompañado pola delegada territorial da Xunta, Belén do Campo, e do xerente da área sanitaria, Luís Verde, ademais de representantes do Club de Leóns da Coruña e da Fundación Adcai, cuxa contribución económica fixo posible este proxecto. A iniciativa forma parte do marco da Estratexia de Humanización de Asistencia Sanitaria de face a mellorar as instalacións sanitarias, con espazos máis amables e minimizar o impacto negativo da hospitalización, expuxo o conselleiro.
‘NOVO CHUAC’: “ESTANSE EMPEZANDO A IMPULSAR” AS OBRAS
Noutra orde de cousas, e preguntado polas obras da ampliación do complexo hospitalario universitario da Coruña, o ‘Novo Chuac’, dixo que se están “empezando a impulsar” as obras. Na mesma liña, pronunciouse o xerente da área sanitaria da Coruña e Cee, Luís Verde, quen afirmou que se está traballando “ao cento por cento” coas actuacións na Torre Polivalente.
Aprobada a demolición do esqueleto do Martinete para comezos de 2025
A Xunta de Goberno Local aprobou este mércores 18 de setembro a adxudicación definitiva das obras de demolición do esqueleto urbanístico existente no barrio do Martinete á empresa Hércules Diggers S.L.
O esqueleto ocupa un soar dunha superficie de máis de 1.100 metros cadrados e co paso dos anos foi converténdose nun foco de insalubridade e maleza, entrañando tamén un risco para a seguridade das persoas pola súa progresiva deterioración. Dado que a propiedade non atendeu os requirimentos do Concello, e tras avaliar o estado do edificio, o Goberno municipal optou por recorrer á vía da execución subsidiaria de cara á súa demolición total.
A actuación conta cun investimento de máis de 773.000 euros e un prazo de catro meses para a súa execución polo que se completarán, previsiblemente, no primeiro trimestre de 2025.
Lembran dende o concello ademais que afrontan tamén a primeira fase de reurbanización da rúa Manuel Ferrol, arredor do residencial do Birloque.
O Martinete únese contra o abandono… e o esqueleto de formigón
Parque Ciudad “Monte Martelo”, un parque que cambia unha cidade
Condenan ao Concello de Coruña a pagar o servizo de xestión de augas residuais en dúas urbanizacións da Zapateira
A concesionaria da xestión de saneamento das augas residuais do Concello de Culleredo -Gestión y Técnicas del Agua S.A.- estivo dende 2017 ata 2022 realizando as mesmas labores para os máis de 700 veciñ@a de dúas urbanizacións de Valaire e O Carón, situadas na Zapateira, no termo municipal da Coruña. E malia ter facturado os 760.375 euros polos servizos prestados, nunca recibira o pago das facturas.
Segundo o Tribunal Superior de Xustiza de Galicia (TSXG), “as correspondentes tarifas aprobadas cobrounas a Empresa Municipal de Aguas de La Coruña, sen que llas entregase despois á concesionaria, senón ao Concello da Coruña, que se lucrou indebidamente duns importes por uns servizos que non prestou e cuxas tarifas consentiu”.
Así, o TSXG vén de acoller en parte o recurso presentado pola empresa contra a sentenza do Xulgado do Contencioso-administrativo número 3 da Coruña, e declara o dereito de Gestión y Técnicas del Agua S.A. a percibir eses 760.375 euros por parte do Concello coruñés.
Con todo, o auto tamén matiza que as facturas levan todas o mesmo importe a pesar de que deberían depender dos caudais das augas que se vertían. Por este motivo, segundo afirman na sentenza, “non se pode validar aquel importe carente da debida xustificación, pero tampouco se pode prestar aprobación, sen máis, aos importes que percibiu a Empresa Municipal de Aguas de La Coruña e que logo entregou ao Concello da Coruña, pois a retribución a que a concesionaria tiña dereito era a que procedía polos servizos realmente prestados e non polos importes recadados (puido haber descubertos)”.
Por iso, explican que o acollemento do recurso (e da demanda) ten que ser parcial, “para declarar o dereito da concesionaria a que esa entidade local lle abone os importes tarifados que procedan polos servizos realmente prestados e medidos, incluídos os do primeiro trimestre do ano 2017, xa que non prescribiron”.
“Abonda con que vertan os inmobles daquelas urbanizacións as súas augas residuais á rede de saneamento do municipio de Culleredo para que a concesionaria que xestiona indirectamente tal servizo teña dereito a percibir a retribución pactada que ninguén impugnou, nin por ser indebida, nin por ser excesiva, e sen que a iso se opoña tampouco o feito de que esas augas discorran despois por outro termo municipal ata a depuradora, o que podería dar lugar a outro tipo de compensación que aquí non se pode examinar”, destaca o alto tribunal galego.
“Cumprir a lei”: Ángeles Vázquez demanda cambios na planta de tratamento de residuos de Nostián
A conselleira de Medio Ambiente, Ángeles Vázquez, instou ao Concello da Coruña a “cumprir a lei” en relación á planta de tratamento de residuos de Nostián, ante un modelo baseado actualmente no húmido-seco, ademais de reclamar a necesidade de implantar o quinto colector.
“Colaboramos con Nostián igual que co resto de sistemas, pero non podemos saltarnos a lei”, manifestou Vázquez para lembrar que existe “unha notificación ministerial que lle di que o sistema húmido-seco non ten cabida en Europa”.
“Tiñan que implantar o quinto colector, ten que cumprirse esa planificación, é lei”, insistiu a titular de Medio Ambiente. “Volverémonos a sentar de novo”, avanzou, no entanto, ao ser preguntada pola citada planta de tratamento.
E é que sobre esta cuestión, e en declaracións aos xornalistas, apuntou que tanto o Consistorio herculino como o Consorcio dás Mariñas “non son alleos ao cumprimento da lei” e recalcou que “hai que implantar o quinto colector e facer a separación en orixe”.
“Corren o risco de non ter axudas de carácter ambiental”, apostilou a conselleira, que fixo estas afirmacións coincidindo coa súa presenza na inauguración do ‘I Foro técnico da Alianza Galega polo Clima’.
Mariscadores da ría do Burgo: “Deixaronnos tirados na rúa”
Mariscadores e mariscadoras da ría do Burgo demandaron o pago de axudas mentres non poidan faenar tras a finalización das obras de dragado, á espera de que crezan as crías, nunha nova protesta con corte de tráfico na ponte da Pasaxe.
“É un deixamento deixar aos traballadores tirados na rúa, sen poder traballar e sen ningún tipo de ingreso”, denunciou, en declaracións a Europa Press, o portavoz do colectivo, Manuel Baldomir. Fíxoo tras lamentar que haxa convocada unha nova mesa de negociación o día 23 e que por parte do Goberno central “non fixesen manifestación ningunha para confirmar” a asistencia dalgún representante.
“Non houbo resposta ningunha para reunirse connosco, están aferrados a non querer dar unha solución aos traballadores da ría do Burgo nin á propia Confraría”, lamentou en alusión ao Partido Socialista. “Se os traballadores non temos ingresos, a Confraría tampouco e pode abocar ao peche da entidade”, advertiu sobre esta problemática que afecta ás 74 familias que vivían do marisqueo da ría do Burgo e que, unha vez finalizadas as obras de dragado e acometida a sementeira, ata que poidan faenar deben esperar entre 18 e 24 meses.
“Os traballadores que non poden facer fronte aos pagos, pode carrexar débedas con Facenda e sufrir embargos”, apostilou. Ao mesmo tempo, Baldomir agradeceu “a deputados de distintos partidos políticos, omitindo ao PSOE” que se “comprometeron defender os intereses da Confraría e os intereses socioeconómicos da ría do Burgo”. Todo iso nunha mobilización que provocou retencións na avenida de Alfonso Molina, en dirección saída, sen maiores incidencias.
