A exposición internacional ‘AI: More than Human’, que expón un percorrido polo pasado e o presente da Intelixencia Artificial (IA) desde os seus inicios ata a actualidade, atraeu a case 9.000 visitantes á sede Abanca da Coruña dende o mes de setembro.
Segundo sinalou a entidade nun comunicado, a cidade galega é o primeiro destino da mostra en territorio da Unión Europea,tras a súa estrea nas sedes do propio Barbican Centre, produtor da mesma, e o Forum Groningen de Países Baixos, que coproduce o proxecto.
O percorrido, que ocupa todo o edificio da Sede de Afundación, comeza nas primeiras orixes do concepto de intelixencia artificial, ancorado no sintoísmo xaponés, ata chegar á realidade tecnolóxica actual co uso doméstico de asistentes por voz ou robots aspiradores.
Así mesmo, subliñou que a exposición “está a mostrar unha singular capacidade para atraer públicos de todas as idades” e que o principal atractivo é “o carácter experimental da mostra, así como a posibilidade de interactuar con videoxogos, ou robots como o can Aibo“.
Ademais, resaltou que “máis do 16 % dos visitantes optou por coñecer a exposición a través dunha visita guiada” e que “grazas á programación didáctica especialmente deseñada para público de todas as idades máis de 2.200 escolares pasaron xa por ‘More than Human'”.
A exposición pode visitarse ata o próximo 5 de febreiro de 2023, de luns a domingo e en horario de 12.00 a 14.00 horas e de 17.30 a 20.30 horas, excepto os luns que abre só polas tardes.
Alarma esta mañá de martes 19 de novembro no porto exterior de Punta Langosteira.O 112 era alertado, arredor das 6:45h, dun conato de incendio, que afectaba á parte superior dunha pila de carbón situada no exterior, pero que quedou extinguido antes de que puidese avanzar, gracias á rápida actuación dos Bombeiros da Coruña.
Ademais de sufocalo, utilizaron unha pa para remover o material afectado.
Tamén acodiron Garda Civil, a e Protección Civil de Arteixo saíron cara ao lugar.
Non pasaron desapercibidas o pasado 25 de novembro unhas declaracións do adestrador do Deportivo Óscar Cano. Cos logos do 25N detrás, soltou un micromachismo de libro na rolda de prensa, co amparo dos xornalistas presentes.
O que para moitos é unha frase “típica”, “normal”, “sen mala intención”, para asociación A terra, o balón mais elas é unha clara mostra de “falta de respecto ás mulleres”.
“Parécenos lamentábel que neste día marcado, minutos despois de ler un manifesto en contra da violencia machista, coa publicidade da campaña ás súas costas, faga un comentario faltándolle ao respecto ás mulleres. Non podemos entender como unha persoa, nunha contorna profesional, se mostre tan cómodo pronunciando esas palabras e non leve a unha reacción inmediata por parte do club. Pensamos que un club como o RC Deportivo debería establecer nos seus códigos internos unha persecución contra o tipo de “chascarrillos” do estilo do manifestado por Cano Moreno, que non fan máis que asociar o fútbol a comportamentos criticados en calquera outro contexto social dos nosos tempos e das nosas democracias”, denuncia a entidade.
Unha Asociación que naceu “como unha necesidade para que o fútbol mude moitos dos seus discursos inadecuados e as manifestacións do señor Cano Moreno obriganos a reaccionar só dous días despois da nosa presentación”.
Por iso, piden que “o señor Óscar Cano Moreno pida desculpas públicamente por abafallar as mulleres”.
Ocean Winds asinou un acordo de reserva de capacidade co consorcio Navantia-Windar para fabricar 62 ‘jackets’ para aeroxeradores que se construirán en Fene (A Coruña), con destino ao seu parque eólico mariño de Dieppe lle Tréport, en augas do norte de Francia.
Segundo informou Navantia, o proxecto, que se trata do maior adxudicado a Navantia Seanergies (a marca para o negocio de enerxías verdes da compañía pública) e Windar ata a data, materializarase proximamente nun contrato.
En concreto, o parque francés de Dieppe Lle Tréport contará cunha capacidade de xeración de 496 megawatts (MW), suficientes para abastecer de electricidade sustentable a unhas 850.000 persoas ao ano a partir de 2026.
O parque é propiedade do consorcio formado pola empresa española Ocean Winds (formada pola francesa Engie e a portuguesa EDP Renováveis), a xaponesa Sumitomo Corporation e a entidade financeira francesa Banque deas Territoires.
Os traballos de fabricación iniciaranse no estaleiro de Fene no primeiro trimestre de 2023 con duración aproximada de dous anos e catro millóns de horas de traballo.
As ‘jackets’ son un tipo de cimentación fixa realizada en aceiro que serve de base para os aeroxeradores que se instalan no mar. As deste contrato serán ‘jackets’ de catro patas, cun peso de ao redor de 1.000 toneladas.
Ademais, Navantia Seanergies construirá en Puerto Real dous ‘jackets’ de subestación, unha delas para a subestación eléctrica deste parque e a segunda destinada ao parque de Îles d’Yeu et Noirmoutier.
Ambos os proxectos contan con capacidade reservada en Puerto Real desde o pasado xuño. Este mesmo proxecto tamén dará ocupación adicional a Windar Renovables, que nas súas instalacións de Avilés fabricará 248 piles.
Ocean Winds xa anunciou o pasado mes de xullo a contratación a Navantia-Windar en 2022 de 14 monopiles que se construirán na nova fábrica de Fene. Os monopiles son un tipo de cimentación fixa, distinta da ‘jacket’, que consiste nun alicerce único para cada aeroxerador.
Voltou a competición na OK Liga de hockei sobre patíns, tralo mal sabor que nos deixou nos beizos o Campionato do Mundo de Arxentina, co decepcionante quinto posto da selección masculina e o digno subcampionato das féminas.
O primeiro equipo masculino do Deportivo Liceo retomou o ritmo na liga con dous partidos na mesma semana, enfrontándose ó potentísmo F.C. Barcelona no Pazo dos Deportes de Riazor, para despois viaxar a Alcoi. O encontro de Riazor foi igualadísimo, digno dos dous favoritos ó título, os dous derradeiros Campións da OK Liga. A victoria final levárona os barcelonistas por 2 a 3, pero sufrindo ata os últimos intres.
Tres días máis tarde o Liceo, moi necesitado de puntos, saltaba á pista como visitante para enfrontarse ó PAS Alcoi. Desta vez acadaron a victoria por 0 a 2 e colocáronse no segundo posto da táboa, perseguindo a un Barcelona que ya abriu a brecha a 6 puntos.
Este ano parece que os da cidade condal non teñen pensado deixar fuxir outra liga, e iniciaron o campionato imparables, cun pleno de 8 victorias consecutivas.
As rapazas do Liceo, pola súa parte, venceron ó C.P. Votregá pola mínima, 5 a 4, acadando tres puntos valiosísimos ante un rival directo. Marchan no 9º posto, tentando alonxarse canto antes da zona baixa da clasificación.
A análise dos dous equipos verdibrancos tralo primeiro tercio da liga regular é algo dispar, ademáis de enganoso. O equipo feminino, tralo dignísimo 6º posto da tempada pasada, buscan asentarse na zona media-alta da táboa. Queren facerse merecedoras dun lugar entre os equipos de primeiro nivel. Sen aspirar ó título, pero sen pasar apuros. Buscando competir e acadar os postos que dan acceso a disputar a Copa, primeiro, e despois xa veremos. Espero sinceiramente que poidan cumprir os seus obxetivos, pois a esas rapazas sóbralles esforzo e ilusión, a pesar de que lles falten medios.
No outro lado está o masculino. O buque insignia, o equipo que acapara a case totalidade dos recursos do clube. Houbo renovacion integral do plantel, trala marcha de ata sete xogadores, pero aínda así vemos que o equipo segue a competir ó máximo nivel.
Segundo na táboa e dando a cara contra calquer rival. Pero a pregunta non é se o Liceo compite, pois eso no caso dos verdibrancos dase por descontado. A cuestión é por que o actual campión de liga ten que se reconstruir por completo. Por que se dá esta desbandada no que foi o mellor o equipo da tempada pasada. Normalmente os equipos desmantelados son os que están en crise. No caso do Liceo é máis que evidente que a crise non é deportiva. A súa crise, e esto é moitísimo máis preocupante, é institucional. E para nada é pasaxeira, leva moito tempo instalada en Matogrande. Sobrevivindo a xogadores, técnicos, directivos, proxectos…
Moitos cren coñecer as causas, pero o verdadeiramente difícil é acadar as solucións.
Fernando Campos Matiñán. Comecei a xogar ó hóckey sobre patíns no Liceo ós 8 anos.
Licenciado en CC. Da Actividade Física e o Deporte no INEF de Galicia. Entrenador e preparador físico de varios clubes (INEF Galicia, CP. Ordenes, EMH Cee, HC Liceo) Actual entrenador do Colexio Obradoiro.
A alcaldesa da Coruña, Inés Rey, recibiu este luns, no Palacio Municipal de María Pita, aos representantes do oito centros educativos que participaron nun pleno infantil, con motivo do Día Mundial da Infancia, conmemorado o pasado 20 de novembro.
Un total de 40 nenos e nenas achegáronse ao concello en representación do oito centros educativos, acompañados por máis de 60 compañeiros e compañeiras e profesores responsables.
Os representantes presentaron as súas conclusións, froito do traballo dos dereitos asignados baseándose na Convención sobre os Dereitos dos Nenos a cada unha das escolas.
A alcaldesa, Inés Rey, presidiu o pleno acompañada do concelleiro de Educación, Memoria Histórica, Innovación, Industria e Emprego, Jesús Celemín.
“Volvemos convocar este pleno infantil para escoitar o moito que traballástedes nas propostas e para aprender convosco todo o que vós aprendestes ao preparar este pleno, escoitando as vosas ideas, opinións e propostas para esta cidade“.
Persoal de Correos mobilizouse en Santiago de Compostela e na Coruña en demanda de melloras salariais e laborais, nunha xornada convocada polos sindicatos CGT, LAB, ESK, ELA, SiPcte, Intersindical Valenciana e CNT, que representan ao 12 % dos traballadores e que convocaron unha folga xeral este luns.
Entre as súas demandas está a inclusión no novo convenio colectivo da cláusula de revisión salarial para vincular os soldos ao IPC; a instauración das 35 horas semanais; a cobertura real de todas as prazas estruturais e a recuperación de todos os postos de traballo perdidos nos últimos 20 anos.
Á súa vez, tamén inclúen reivindicacións de índole institucional como o aumento da partida orzamentaria para a prestación do Servizo Postal Universal (SPU) e a inclusión do persoal de Correos no Estatuto Básico do Empregado Público (EBEP).
En relación a estas demandas, Alfonso Bermejo, carteiro rural en Oleiros e delegado de CGT na Xunta de Persoal, non descartou unha nova convocatoria de folga se non se atenden as súas demandas, en concreto nas xornadas do día 22 e 23 e tamén o 4 e o 5 de xaneiro.
“O problema máis urxente é a perda de poder adquisitivo pola subida do IPC este ano, pero tamén porque son 10 anos perdéndoo”, dixo situándoa nun 20 % no persoal laboral e un 25 % no funcionario.
No caso dos traballadores do rural, lembrou que os carteiros “achegan” o seu vehículo particular. “Págasenos gasolina e mantemento, pero desde 2011 non subiu un só céntimo”, apostilou.
Continúan posicionándose as listas dos grupos municipais de cara ás eleccións municipais do vindeiro 28 de maio de 2023. Pola esquerda, Podemos e Esquerda Unida confirmaron que van presentarse conxuntamente ás próximas eleccións municipais na Coruña. Os dous grupos seguen pendentes da Marea Atlántica, á que ofrecen diálogo para formar “unha fronte ampla”.
Así o expuxeron a concelleira de Podemos no consistorio coruñés, Isabel Faraldo, e a coordinadora local de Esquerda Unida, Carmen Armada, nunha rolda de prensa na que confirmaron que se se puxeron en contacto coa Marea Atlántica, pero que non obtiveron, polo momento, resposta. E, aínda que a primeira argumentou que non van seguir “esperando por ninguén”, incidiu en que a candidatura non está “pechada” e que se mantén a disposición ao diálogo.
En canto á persoa que liderará a candidatura, sinalou que non está tampouco “pechado” e que está por determinar se pode ser ela ou Armada ou “mesmo máis aló de Podemos ou Esquerda Unida”. “Iso decidirase”, apelando á procura dunha “figura de consenso” sobre a que, avanzou, está a traballarse.
Noutra orde de cousas, e sobre a influencia que o proceso en Podemos para elixir ao seu novo secretario xeral poida ter nas municipais, Faraldo, que forma parte da candidatura de Borja San Ramón, descartou, a preguntas de Europa Press por esta cuestión, que poida repercutir de forma negativa e incidiu en que o “importante agora é implantar Podemos en Galicia”.
A Audiencia Provincial da Coruña celebrará a próxma semana tres xuízos por abuso sexual a menores. No caso da sección segunda, celebrará dous: uno o día 29 e outro o día 30, que será a continuación da vista, mentres que na sección primeira haberá un o día 30.
No do día 29, segundo informa Fiscalía, o acusado enfróntase a sete anos e seis meses de prisión por un delito continuado de abusos sexuais sobre menor de idade, coa que convivía de forma frecuente, por razón de parentesco, no seu domicilio. A nai foi quen denunciou os feitos tras contarllo a vítima.
Xa para o día 30 están fixados dous xuízos, dos que un deles celebrarase a porta pechada. Neste caso, o procesado enfróntase a 12 anos de cárcere por abusar sexualmente dunha menor coa que ten unha relación de parentesco.
O Ministerio Fiscal pide tamén a perda da patria potestade respecto da filla en común que ten coa súa exparella durante un tempo de catro anos. Actualmente o acusado mantén un réxime de visitas con esta, existindo, segundo Fiscalía, unha situación de risco derivada da conduta do acusado.
No outro xuízo fixado para ese día, o procesado, segundo o Ministerio Público, “actuando cun evidente ánimo libidinoso e de satisfacción persoal, foi sorprendido cando saía do dormitorio da súa fillastra”, cunha minusvalía do 43 %, “tras levar a cabo algún acto de natureza sexual cuxo alcance non puido ser determinado” ao estar ela durmida.
Ademais, engade que “nun período de tempo non concretado, pero en todo caso e de forma habitual dende que cumpriu os 10 anos, o acusado veu cometendo actos de similar natureza ao descrito anteriormente”, que sitúa en 2020. Por un delito continuado de abuso sexual, pide unha pena de dez anos de cárcere.
O Partido Comunista de Galicia celebrará este sábado na Coruña o seu XV Congreso, no que Jorge Crego será elixido novo secretario nacional en substitución de Eva Solla, que é a coordinadora nacional de Esquerda Unida (EU).
O evento celebrarase ao longo de toda a xornada no Edificio dos Sindicatos da cidade herculina, onde os delegados do partido debaterán sobre a liña política da organización e elixirán á nova dirección.
Hai unha lista unitaria que encabeza o coruñés Jorge Crego e que inclúe entre os seus membros a Solla, que levaba á fronte do PCG desde 2014.
