As cifras poboacionais publicadas polo Instituto Galego de Estatística sobre as dúas últimas décadas na comarca da Coruña dan para unha boa análise.

A comarca, formada por 9 concellos (A Coruña, Abegondo, Arteixo, Bergondo, Cambre, Carral, Culleredo, Oleiros e Sada), medrou un 13,1%, chegando a ter a día de hoxe unha poboación de 404.228 habitantes (eramos 357.320 en 2002). Unha cifra que supón o 36% da poboación da provincia da Coruña (que ten 1.122.033) e o 15% da poboación galega (2.693.451 habitantes).

A cidade herculñina, se ben no último ano perdeu 1.000 habitantes, ten un saldo positivo nas dúas últimas décadas, nas que medrou nun 2,2%, alcanzando a cifra de 241.604 habitantes contabilizados en xullo do pasado 2022.

Un crecemento moi pequeno comparado con outros concellos da área metropolitana. Concellos como Arteixo, Sada ou Oleiros medraron arredor dun 40% nestas dúas décadas, por un 35% no caso de Culleredo, un 29% no de Cambre ou un 25% no de Carral.

Cifras que demostran que o éxodo do rural (as provincias do eixo Atlántico suman máis do 75% da poboación galega) repercute nos concellos máis próximos ás grandes cidades. Unhas 7 grandes cidades galegas que manteñen só un peso do 36% sobre a poboación total galega.