Afundación e o Concello da Coruña impulsan o proxecto de voluntariado para persoas maiores ‘Pedalear e conversar’, unha iniativa que busca combater a soidade non desexada e potenciar as relacións interxeneracionais entre estas persoas e outros da súa contorna, á vez que gozan do espazo público.

A alcaldesa da Coruña, Inés Rey e o presidente de Afundación, Miguel Anxo Escotet, asinaron, no Palacio Municipal de María Pita, o convenio para un programa que conta con dous triciclos activos. Despois de Semana Santa haberá un teléfono habilitado para inscribirse e gozar da experiencia.

A alcaldesa sinalou que ‘Pedalear e Conversar’ “encaixa perfectamente nos obxectivos de loita contra a soidade nodeseada entre os nosos veciños e veciñas de maior idade que estamos a levar a cabo dentro de Coruña ‘Acompaña’, ese gran paraugas que acolle todas as nosas actividades para persoas maiores”.

Pola súa banda, o presidente de Afundación, Miguel Anxo Escotet, subliñou que “a comunicación interxeneracional é moi necesaria para que a mocidade e a xente maior poidan estar en contacto, escoitarse e conversar, para aprender e enriquecerse mutuamente”.