O candidato de Marea Atlántica á Alcaldía da Coruña, Xan Xove, apelou a votar o próximo 28 de maio “en clave local“. “Non son eleccións á Moncloa nin un paseo de ministros que veñen a Coruña, a comer o polbo e vólvense para Madrid”, proclamou.
O candidato ‘gaiteiro’, como xa demostrou noutros actos de campaña e como se encargou de lembrar este martes o ex alcalde Xulio Ferreiro, ou “candidato da liña 14”, en referencia aos seus barrios de orixe obreira e de residencia na cidade da Coruña, protagonizou este martes un miten na Praza das Conchiñas. Estivo arroupado polo ex rexedor de Marea Atlántica e polo que foi alcalde simultáneo en Santiago de Compostela, Martiño Noriega, quen non deixou pasar a ocasión de lembrar as súas raíces coruñesas.
Neste escenario, Xove lanzou esta mensaxe “en clave local” para apelar ao voto a Marea Atlántica, que non ten que render contas a outras organizacións fóra da Coruña, que “non é unha franquía, nin delegación”. Aínda que só citou especificamente como membros do Consello de Ministros ao presidente do Goberno, Pedro Sánchez, precisamente este martes confirmouse a presenza da vicepresidenta segunda, Yolanda Díaz, na Coruña o vindeiro xoves.
A Sánchez reprochoulle, entre outras cuestións, que non viñese anunciar a condonación da débeda do porto ou que dicía o edificio coñecido como Vello Cárcere. Non se referiu a ela, pero este mesmo martes a candidatura ‘rival’ no mesmo espazo político, Por Coruña (alianza de Podemos e Esquerda Unida, que antes estaban integradas en Marea Atlántica), confirmou a presenza de Yolanda Díaz nun acto na Praza de María Pita, xusto despois de acudir a Santiago a apoiar a Compostela Aberta.
E non en balde, esta rivalidade fixo caer da foto de ‘ex alcaldes do cambio’ a que o foi tamén en 2015-2019 en Ferrol, Jorge Suárez, quen figuraba no cartel do acto deste martes. Con todo, esta cita ‘molestou’ a Por Coruña e finalmente Suárez optou por non acudir á cita na Coruña, unha ausencia que foi desculpada no mitin.
CHAMAMENTO A “CONVENCER”
Na súa intervención, Xan Xove apelou a toda a cidadanía coruñesa, aos “incumprimentos” da alcaldesa do PSOE, Inés Rey, empezando por “o ferry” a Londres desde A Coruña, sen que fose capaz de facer “un carril bus en Juan Flórez”. Ademais, na súa intervención fixo fincapé na necesidade de integrar a todos os barrios da cidade e na vivenda, tanto en conseguir alugueres alcanzables para toda a cidadanía como na mobilidade e, en concreto, os ascensores.
“Faltan dez días de campaña, hai unha de cada dez persoas que non decidiu o seu voto. Pídovos convencer para que Marea Atlántica sexa decisiva e volva gobernar o próximo 28 de maio”, proclamou Xan Xove, quen asegurou que non hai nada “imposible”.
