‘Viñetas desde o Atlántico 2023’ contará na súa 26ª edición cunha vintena de talleres infantís e profesionais abertos ao público, cuxas inscricións se activan a partir deste xoves, 3 de agosto, ás 10,00 horas.

Así, segundo detallou o Concello, búscase diversificar a oferta deste certame, que este ano empeza un novo camiño coa organización directa do consistorio municipal e a colaboración do sector do cómic coruñés.

A mostra internacional de cómic da cidade da Coruña estrea este ano unha nova actividade lúdica orientada ao público infantil: a iniciativa Viñetas Lab, que do 7 a 13 de agosto reunirá un total de 15 talleres para nenas e nenos de 6 a 12 anos no Palco da Música dos Xardíns de Méndez Núñez, que estará especialmente decorado parala ocasión.

Ademais, a Biblioteca Durán Loriga acollerá dous talleres infantís de iniciación ao cómic e o taller para nenas e nenos ‘As túas primeiras viñetas’, mentres que a Biblioteca de Estudos Locais porá en marcha un ‘Obradoiro express de novela gráfica’ para profesionais, estudantes de arte e afeccionados ao debuxo.

O público poderá inscribirse nos diferentes talleres, que son de acceso gratuíto cun número máximo de asistentes, a partir do xoves, 3 de agosto, ás 10,00 horas, dos seguintes modos: no caso das Bibliotecas Municipais, chamando por teléfono, acudindo presencialmente ou a través da páxina web https://www.coruna.gal/bibliotecas. No caso de Viñetas Lab. Espazo infantil, as inscricións realizaranse a través do correo electrónico ludidactica@gmail.com.