A Corte Suprema de Manila ordenou o traslado do xuízo polo asasinato do coruñés Diego Bello, abatido por tres policías filipinos en xaneiro de 2020, á capital de Filipinas. A familia do mozo galego comunicou a noticia, un traslado que os propios avogados da familia solicitaran en setembro de 2022.

Así, a Corte Suprema de Filipinas ordena ao Xulgado Rexional de Dapa-Surigao do Norte, lugar onde tiveron lugar os feitos, o traslado de todo o expediente relacionado cos dous casos que van ser xulgados, un por asasinato e outro por falsificación de probas.

A Corte dá tres días ao Xulgado Rexional de Dapa para remitir a documentación a Manila e ordena que á súa recepción adxudíquese inmediatamente a un dos xulgados da capital o caso.

Ademais, a Corte Suprema, no escrito dado a coñecer este mércores, rexeita os argumentos presentados en novembro de 2022 polos avogados dos policías acusados opóndose ao traslado do expediente. Baseábanse nas supostas ameazas recibidas polas testemuñas dos feitos, ameazas que a Corte considera “meras presuncións sen probas concretas de tales ameazas”.

A familia recibiu a resolución de bo grado, xa que entenden que o traslado da causa pode supor “unha maior celeridade” no proceso xudicial “ao contar con máis medios os xulgados da capital e unha maior facilidade para o seguimento do xuízo”, cuxa data de inicio decidirá o xulgado que se faga cargo.