Os concellos coruñeses de Betanzos e Bergondo decretaron o peche de fontes ornamentais, a eliminación das regas como método de limpeza da vía pública e prohibiron o enchido de piscinas como medidas para facer fronte á situación de seca prolongada que afecta á zona das rías da Coruña e Ferrol.

En senllos bandos municipais emitidos este martes, as alcaldías dos municipios coruñeses ordenan unha serie de medidas para tratar de aforrar auga ante a escaseza que se atravesa a estas alturas do verán pola falta de choivas durante o ano. Restrinxen e pechan o uso de fontes ornamentais, eliminan as regas de rúas para limpeza e prohiben o enchido de piscinas, ademais de instar os seus veciños a non lavar os seus vehículos. No caso de Bergondo, avanzan que se acometerán medidas para controlar o consumo de auga en edificios e instalacións municipais, así como para detectar perdas na rede municipal.

Así, apelan á concienciación cidadá sobre o consumo de auga para evitar o seu gasto innecesario. “Regresaremos á normalidade se o réxime de choivas do comezo do outono e do inverno recupera os niveis habituais para esas datas, pero tamén temos que ser quen de afrontar a prolongación deste estado excepcional de seca, de ser necesario”, explicou a alcaldesa de Bergondo, Alejandra Pérez Márquez.

En Betanzos, que corta desde este mércores a subministración de auga da traída municipal para as fontes ornamentais, manteranse “como algo excepcional” as festas infantís coa auga como protagonista programadas para esta xornada e a do xoves debido ás altas temperaturas que se rexistran.